هەوڵ بۆ بەهەرێمبوونی پارێزگای ئەنبار دەدرێت

ئاڤا نیوز

 

ژمارەیەک لە کەسایەتییە سیاسی و کۆمەڵایەتییەکانی پارێزگای ئەنبار بەمەبەستی دروستکردنی کۆدەنگی بۆ بەهەرێمبوونی ئەنبار کۆبوونەتەوە، بەڵام دەنگی ناڕازی هەبووە و بەهۆیەوە دەمەقاڵێ دروستبووە. 

 

ئەوەی پێویستە بیزانیت: شێخ عەبدولڕەحمان حەمەد دلێمی یەکێک لە کەسایەتییە دیارەکانی پارێزگای ئەنبار دەڵێت: ئەحمەد ئەبو ڕیشە و عەلی حاتەم سلێمان، کەسایەتی سیاسی و کۆمەڵایەتی پارێزگای ئەنبار، بە پشتیوانی دەرەکی و بەنهێنی لەماڵی ئەبوڕیشە سەرپەرشتی کۆبوونەوەیەکی هەندێک لە کەسایەتییە سیاسی و کۆمەڵایەتییەکانیان کردووە بۆ دروستکردنی کۆدەنگی لەسەر بابەتی بەهەرێمبوونی پارێزگای ئەنبار.

 

زانیاریی زیاتر: بۆ جێبەجێکردنی پرۆژەکە کێشەی پارە نییە، محەمەد حەلبووسی سەرۆکی پێشووی پەرلەمانی عێراق یەکێکە لەوانەی کە بەبەهێزی پشتیوانی پرۆژەکە دەکات، داوای کردووە کە سەرەتا کۆبوونەوەکە لە شاری ڕومادی بکرێت و دواتریش لەشارەکانی دیکە.

 

لەلایەکی دیکەوە: بەشێک لە بەشداربووانی کۆبوونەوەکە بیرۆکەی بەهەرێمبوونی پارێزگای ئەنباریان ڕەتکردووەتەوە بەهۆیەوە دەمەقاڵێ درووستبووە و لە کۆبوونەوەکە کشاونەتەوە.

 

باکگراوند: هەوڵی ئەنبار بۆ دروستکردنی هەرێم، جارێکی دیکە پرسی دروستکردنی هەرێمێک بۆ سوننەکان دەخاتەوە بەر باس کە خاڵێكی دەستووری و كارگێڕیی پێشكەوتووە، بۆ ئەمەش دەستووری عێراق چۆنیەتی پێكهێنانی هەرێمەكانی دیاری كردووە.