لە چۆمان بەهۆی هەورەبروسکە دوو هاونیشتمانی دەسووتێن

ئاڤا نیوز

 

لە یەکەم ڕۆژی پاییز و یەکەم بارانبارینی ئەمساڵدا دوو هاونیشتمانی سنووری قەزای چۆمان بەهۆی هەورەبروسکەوە دەسووتێن.

 

چیڕۆکی سەرەکی: ئەمڕۆ هەینی لە کوێستانەکانی گوندی ناوەندی قەزای چۆمان، دوو هاونیشتمانی لە کاتی سەرقاڵییان بە کاری جووتیاری، هەورەبروسەکەیان بەردەکەوێت و بەشێکی جەستەیان سووتا. 

 

لێدوانی فەرمی: دکتۆر ئەحمەد حەسەن، بەڕێوەبەری تەندورستی چۆمان بە ئاڤا نیوزی گوت: خانەوادەیەکی گوندی ناوەندە لە سنووری قەزای چۆمان لە کاتی سەرقاڵیان بە ڕنینی تەماتە بوون، دوو لە ئەندامانی خانەوادەکە بە ناوەکانی "محەممەد حەسەن" تەمەن 30 ساڵ و "ڕۆژان عەبدوڵڵا" تەمەن 9 ساڵان بەهۆی بەرکەوتنیان بە هەورەبروسکە بەشێکی جەستەیان دەسووتێت.

 

بە گوتەی بەڕێوەبەری تەندروستی چۆمان هەردوو هاونیشتمانییەکە پشت و قاچەکانیان سووتاوە، لە نەخۆشخانەی چۆمان چارەسەری سەرەتاییان بۆ کراوە، دواتر ڕەوانەی نەخۆشخانەی ئاشتیی ئیدارەی سۆران کراون، ئێستا تەندورستی هەردووکیان جێگیرە و مەترسی لەسەر ژیانیان نەماوە.

 

ئەمەش بزانە: هەردوو هاونیشتمانییەکە مام و برازای یەکترن، لەگەڵ کەس و کارییان سەرقاڵی جووتیاری بوون، تەنیا ئەم دوو ئەندامەی خانەوادەکە بەهۆی هەورەبروسکەکە سووتان، ئەوانی دیکە هیچ زیانێکیان بەر نەکەوتووە.

 

باکگراوند: ساڵانە لە وەرزی بارانباریندا بەهۆی ڕەچاونەکردنی ڕێنماییەکانی خۆپارێزی، چەندان هاونیشتمانی بە هەورەبروسکە گیان لەدەست دەدەن و دەسووتێن.