دەوڵەتی یاسا و عەزم داوای یەکلاکردنەوەی پۆستی سەرۆکی پەرلەمان دەکەن

ئاڤا نیوز 

 

سەرۆکی هاوپەیمانیی دەوڵەتی یاسا و هاوپەیمانیی عەزمی سوننەکان کۆبوونەوە و داوا دەکەن لایەنەکان لەسەر  پۆستی سەرۆکی پەرلەمان بگەنە ڕێککەوتن، تاوەکو ئەو پرسەش لە ماوەی داهاتوودا یەکلابکرێتەوە.

 

وێنە گەورەکە: زیاتر لە 10 مانگە محەممەد حەلبووسی، بە بڕیاری دادگەی فیدراڵی لە پۆستی سەرۆکی پەرلەمان دوورخراوەتەوە، لەوکاتەوە سوننەکان بەهۆی ناکۆکییان نەیانتوانیوە کەسێک وەک جێگرەوەی هەڵبژێرن و پۆستەکە بەوەکالەت بەڕێوەدەبرێت.

 

ڕاگەیێنراوی فەرمی: نووسینگەی سەرۆکی هاوپەیمانیی عەزم بڵاوی کردەوە، موسەننا سامەڕائی سەرۆکی هاوپەیمانێتییەکەیان لەگەڵ نووری مالیکی، سەرۆکی هاوپەیمانی دەوڵەتی یاسا کۆبووەتەوە و هەردوولا جەختیان لە پێکەوەکارکردنی هەموو لایەنەکان کردووەتەوە بۆ پاراستنی ئاسایشی وڵات لە بوارەکانی سیاسی، ئابووری، ئەمنی و کۆمەڵایەتی.

 

زانیاری زیاتر: بەگوێرەی ڕاگەیێنراوەکە هەردوولا پێداگربوون لەسەر یەکڕیزی لایەنەکان بۆ ڕووبەڕووبوونەوەی ئەو ئاستەنگیانەی عێراق پێیاندا تێدەپەڕێت، داواشیان کردووە لایەنەکان لەسەر  پۆستی سەرۆکی پەرلەمان بگەنە ڕێککەوتن و ئەو پرسە لە ماوەی داهاتوودا یەکلابکەنەوە.