بەیاننامەی هاوبەشی عێراق و ئەمریکا لەبارەی مانەوەی هێزەکانی هاوپەیمانان لە عێراق

ئاڤا نیوز

 

عێراق و ئەمریکا لە بەیاننامەیەکی هاوبەشدا ڕایدەگەیەنن، لە 12 مانگی داهاتوودا ئەرکە سەربازییەکانی هاوپەیمانی نێودەوڵەتی دژی داعش لە عێراق کۆتایی دێت.

 

وێنە گەورەکە:دوای چەندین گەڕی گفتوگۆ و دانوستان، عێراق و ئەمریکا کە سەرۆکایەتی هاوپەیمانیی نێودەوڵەتی دژی داعش لە عێراق و سووریا دەکات، بەفەرمی ڕایانگەیاند کە ئەرکی هاوپەیمانان لە 12 مانگی داهاتوو لە عێراق کۆتایی دێت.

 

ڕاگەیێنراوی فەرمی: عێراق و ئەمریکا لە بەیاننامەیەکی هاوبەشدا ڕایانگەیاند: عێراق هاوپەیمانییەکی سەرەکیی هاوپەیمانانە، هەروەها لەپێناو ڕێگریکردن لە گەڕانەوەی داعش لە باکووری ڕۆژهەڵاتی سووریا ئەرکە سەربازییەکانی هاوپەیمانان لە سووریا تاوەکو مانگی ئەیلوولی ساڵی 2026 بەردەوام دەبێت.

 

زانیاریی زیاتر: هەردوو وڵات جەختی لە پەیوەندی و هاوکاریی ئەمنی نێوانیان دەکەنەوە و ئەوەش بەپێی ڕێکەوتنی ستراتیژیی نێوانیان و دەستووری عێراق، کاری هاوبەشی بەردەوام دەبێت بە پێی ڕێککەوتن.

 

ئەوەی پێویستە بیزانیت: عێراق سوپاسی هاوپەیمانان دەکات لە شکستپێهێنانی داعش و هاوپەیمانانیش ڕۆڵی عێراق بەرز دەنرخێنێت.

 

باکگراوەند: هاوپەیمانیی نێودەوڵەتی دژی داعش بە سەرۆکایەتیی ئەمریکا لە ساڵی 2014 پێکهێنراو و لە ساڵی 2017 توانرا ڕێکخراوی تیرۆریستی داعش لە عێراق شکستپێبهێنن،  تاوەکو ئێستا هێزە ئەمنییەکانی عێراق لەگەڵ هاوپەیمانان بەردەوامن لە بە ئامانج گرتنی شانە نووستووەکانی داعش لە پارێزگاکانی نەینەوا، کەرکووک، سەڵاحەدین، ئەنبار و دیالە.