دانا ئەحمەد مەجید بە ڕێکخەری گۆڕان دەستنیشان کرا

ئاڤا نیوز

دانا ئەحمەد مەجید لە دەرەوەی گردی زەرگەتە بە ڕێکخەری گشتیی گۆڕان دەستنیشان کرا و لە مەراسیمێکدا عومەری سەید عەلی سەرجەم دەسەڵاتەکانی ڕادەست کردن.

وێنە گەورەکە: دوای ناکۆکییە ناوخۆییەکانی بزووتنەوەی گۆڕان و داخستنی دەرگای گردی زەرگەتە لەلایەن نما و چیا، کوڕانی نەوشیروان مستەفا، دوا نیوەڕۆی ئەمڕۆ شەممە 28- 9- 2024، لە دەرەوەی گردەکە و لە هۆڵێکی بۆنەکانی شاری سلێمانی، ڕێکخەری نوێی گۆڕان بەوەکالەت دەستنیشان کرا و ڕێوڕەسمی دەستاودەستکردنی دەسەڵات لە عومەری سەید عەلییەوە بۆ دانا ئەحمەد مەجید ڕێکخرا.

 

ئەوەی پێویستە بیزانیت: پێشتر عومەری سەید عەلی بەبێ دەنگدان و گەڕانەوە بۆ جفاتی نیشتمانی بزووتنەوەکە بریکارنامەی بۆ دانا ئەحمەد مەجید کردبوو، ئەمڕۆش تەواوی دەسەڵاتەکانی ڕادەست کردن.

 

کۆنگرەی ڕۆژنامەوانی: دلێر عەبدولخالق، گوتەبێژی بزووتنەوەی گۆڕان لە کۆنگرەیەکی ڕۆژنامەوانیدا ڕایگەیاند: داوای لێبووردن لە میللەتەکەمان دەکەین ئەگەر نائومێدمان کردبن یان هەڵەیەکی سیاسیمان کردبێت، هیوادارین دەرفەتێکی دیکەمان پێ بدەن تا بتوانین گۆڕان سەربخەین.

 

لەلایەکی دیکەوە: لەبارەی داخستنی گردی زەرگەتە گوتەبێژی گۆڕان گوتی: "بۆ ڕووداوەکانی ڕۆژانی ڕابردوو و داخستنی درگای مەکۆی سەرەکی بزووتنەوەکە بەڕووی هەڵسوڕاوان و هاوڕێکانی نەوشیروان مستەفا بەداخەوەین، هەر کەسێک لەپشت ئەم ڕووداوانە بێت بڕیارێکی هەڵەی داوە".

 

باکگراوند: مانگێکە پرسی دانانی ڕێکخەری بزووتنەوەی گۆران مژارێکی گەرمە و هەردوو باڵی عومەری سەید عەلی و کوڕانی نەوشیروان مستەفا لەسەری ناکۆکن، بە پاساوی "دروستنەبوونی گرژی و ئاڵۆزی"یش لە دوێنێوە دەرگای گردی زەرگەتە کە بارەگای سەرەکی گۆڕانی لێیە، لەلایەن کوڕانی نەوشیروان مستەفا داخراوە دەڵێن بۆ کاتێکی نادیار دەوامی تێدا ناکرێت، بڕیارە بزووتنەوەی گۆڕانیش بارەگایەکی نوێ لە دەرەوەی گردەکە بکاتەوە.