تەندروستیی دهۆک هەلی کار ڕادەگەیێنێت

ئاڤا نیوز

بەڕێوەبەرایەتیی تەندروستیی دهۆک ژمارەیەک هەلی کار لە نەخۆشخانەی 100 قەرەوێڵەیی ئامێدی ڕادەگەیێنێت.

چیرۆکی سەرەکی: ئەمڕۆ یەکشەممە بەڕێوەبەرایەتیی تەندروستیی دهۆک هەلی کاری بەشێوەی کرێی ڕۆژانە لە نەخۆشخانەی 100 قەرەوێڵەیی ئامێدی ڕاگەیاند.

‌ڕاگەیێنراوی فەرمی: تەندروستیی دهۆک ڕوونیکردووەتەوە: پێویستە ئەو کەسە دانیشتووی دەڤەری ئامێدی بێت و دەرفەتی وەرگرتن بۆ ڕەگەزەکان وەک یەکە واتە 50%  بە 50٪. هاوکات نابێت ئەو کەسە لە هیچ شوێنێکی دیکە کار بکات، شوێنی کارکردنیشی بۆ هیچ شوێنێکی دیکە ناگوازرێتەوە. ئاماژەی بە ژمارەی هەلی کارەکانیش نەکردووە.

باکگراوند: یەکێک لە ئامانجەکانی کابینەی نۆیەمی حکومەتی هەرێمی کوردستان، بەرزکردنەوەی ئاستی ئەو خزمەتگوزاریییانە کە لە سێکتەری تەندروستی پێشکەش کراون، لەم چوارچێوەیەدا نەخۆشخانەی 100 قەرەوێڵەیی لە سنووری قەزای ئامێدی بە گوژمەی 43 ملیار دینار دروستکراوە.

ئەمەش بزانە: نەخۆشخانە 100 قەرەوێڵەییەکە دەکەوێتە نێوان ناحیەی دێرەلووک و کۆمەڵگەی هیتیتێ، بەشی ژنان و لە دایکبوون، نەشتەرگەری و چەندین بەشی دیکە لەخۆدەگرێت و پێشتر بڕیار بوو 250 پزیشک و پەرستار و کارمەندی بۆ دابمەزرێن.

لەڕێگەی ئەم لینکەوە دەتوانن فۆرم پڕبکەوە.