پەرلەمانی عێراق دەنگ لەسەر پرۆژەیاسایەکی تایبەت بە کەرکووک دەدات

ئاڤا نیوز

پەرلەمانی عێراق کۆدەبێتەوە و یەکەم بڕگەی دانیشتنەکە دەنگدان دەبێت لەسەر پرۆژەیاسای "گەڕانەوەی موڵک بۆ خاوەنەکانیان بەپێی هەندێک لە بڕیارەکانی ئەنجوومەنی سەرکردایەتی شۆڕش".

بۆچی گرنگە: لە ڕێگەی دەنگدان بەو پڕۆژەیاسایە کە لە پێج ماددە پێکهاتووە، زیاتر لە 300 هەزار دۆنم موڵک و ماڵی هاونیشتمانیانی کورد و تورکمانی کەرکووک کە بە بڕیاری بەعس دراون بە عەرەبی سوننە، بۆ خاوەنەکانیان دەگەڕێتەوە.

ڕاگەیێنراوی فەرمی: نووسینگەی پەرلەمانی عێراق کارنامەی دانیشتنی ڕۆژی سێشەممە 1-10-2024ی ئاشکرا کرد کە چەند بڕگەیەک لەخۆدەگرێت، ئەوانیش دەنگدان دەبێت بە پڕۆژە یاسایەک، خوێندنەوە بۆ دوو پرۆژەیاسا و گفتوگۆکردن لەبارەی پرۆژەیاسای دیکە.

زانیاریی زیاتر: بڕگەی یەکەمی دانیشتنەکە دەنگدان دەبێت لەسەر پرۆژەیاسای گەڕانەوەی مووڵک بۆ خاوەنەکانیان بەپێی هەندێک لە بڕیارەکانی "ئەنجوومەنی سەرکردایەتی شۆڕش".

 

ئەوەی پێویستە بیزانیت: سوننەکان دژایەتی خۆیان بۆ دەنگدان لەسەر پرۆژەیاساکە نەشاردووەتەوە، بە بڕوای ئەوان گەڕاندنەوەی ئەو موڵکانە بۆ خاوەنەکانیان کێشەی کۆمەڵایەتی لێدەکەوێتەوە. شیعەکانیش لارییان نییە لە دەنگدان بە پڕۆژەیاساکە، بەڵام داوای پاڵپشتیی کورد لە پڕۆژەیاسای باری کەسی دەکەن.