گەشتەکانی فڕۆکەخانەی هەولێر ڕانەگیراون

ئاڤا نیوز

بەڕێوەبەری فڕۆکەخانەی نێودەوڵەتی هەولێر ئەو دەنگۆیانە ڕەت دەکاتەوە کە باس لە ڕاگرتنی گەشتە ئاسمانییەکانی هەولێر دەکەن و دەڵێت: گەشتەکانمان بەردەوامن.

 

وێنە گەورەکە: ئەگەر هەیە ئەمشەو سوپای ئیسرائیل وەڵامی هێرشە مووشەکییەکەی ڕۆژی 1-10-2024 ی ئێران بداتەوە، بەتایبەت کە سبەی دووشەممە ساڵیادی هەڵگیرسانی شەڕی غەززەیە، بەو هۆیەوە دەستەی فڕۆکەوانیی ئێران لە کاتژمێر 09:00ی ئەمشەو تاوەکو کاتژمێر 06:00ی بەیانی سەرجەم گەشتەکانی هەڵوەشاندوونەتەوە.

 

لێدوانی فەرمی: ئەحمەد هۆشیار، بەڕێوەبەری فڕۆکەخانەی نێودەوڵەتیی هەولێر بە ئاڤا نیوزی ڕایگەیاند: "گەشتەکانی فڕۆکەخانەی نێودەوڵەتی هەولێر ئاسایین و ڕانەگیراون".

 

گۆشەیەکی دیکە:  جگە لە هێرشکردنە سەر ئێران، بەهۆی هێرشەکانی بەرەی مقاوەمەی عێراق بۆ سەر ئیسرائیل، مەترسی تۆڵەسەندنەوە و هێرشکردنە سەر عێراقیش هەیە لەلایەن ئیسرائیلەوە، بەتایبەت بۆ گرووپە چەکدارەکانی حەشدی شەعبی.

 

باکگراوند: شەوی ڕابردوو ڕێگە بە نیشتنەوەی بەشێکی زۆری ئەو فڕۆکانە نەدراوە کە بۆ فڕۆکەخانەی بەغدا هاتوون، بەڵام تاوەکو ئێستا گەشتەکانی فڕۆکەخانەی نێودەوڵەتی هەولێر ئاسایین و بەردەوامن.