پارتی هەڵمەتی هەڵبژاردنی دەگۆڕێت

ئاڤا نیوز

پارتی بە بەشداریی مەسرور بارزانی کەرنەڤاڵێکی گەورەی جەماوەری لە زاخۆ ڕێکدەخات و چاوەڕوان دەکرێت 50 هەزار کەس ئامادەبن.

 

چیرۆکی سەرەکی: پارتی دیموکراتی کوردستان هەڵمەتی هەڵبژاردنی دەگۆڕێت و لەمڕۆوە دەست بە ڕێکخستنی کەرنەڤاڵی گەورەی جەماوەری دەکات.

زانیاریی زیاتر: یەکەم کەرنەڤاڵی پارتی لە یاریگای نێودەوڵەتیی زاخۆ بە بەشداریی مەسرور بارزانی، جێگری سەرۆکی پارتی دەبێت و چاوەڕوان دەکرێت 50 هەزار کەس ئامادەبن.

 

لێدوانی فەرمی: گوهدار شێخۆ، سەرپەرشتیاری ئیدارەی سەربەخۆی زاخۆ میوانی بەرنامەی نان و چای ئاڤا بوو کە بەیانی ئەمڕۆ بەشێوەیەکی جیاواز لە شارەکە بەڕێوەچوو. ئەو بۆ ئاڤا باسی کرد کە ئامادەکاری تەواویان بۆ کەرنەڤاڵەکە کردووە. داواشی لە هەموو زاخۆییەکان کرد بەشداری کەرنەڤاڵەکە بکەن.

ئەمەش بزانە: لە کەرنەڤاڵەکە هەردوو هونەرمەند عەبدولقەهار زاخۆیی و عەممار کۆفی بەشدار دەبن، گۆرانی بۆ 50 هەزار کەس دەڵێن، کە 30 هەزاریان لە گۆڕەپان و 20 هەزاریان لەسەر پەیژەکانی یاریگە ئامادەدەبن، دوای زاخۆ، پارتی لە هەولێر و دهۆک و سۆران و شارەکانی دیکەش کەرنەڤاڵی گەورە ڕێکدەخات.