مەسرور بارزانی: سەرکەوتنی پارتی مسۆگەرە

ئاڤا نیوز

 

مەسرور بارزانی ڕایدەگەیێنێ، لەم هەڵبژاردنە سەرکەوتنی پارتی مسۆگەرە، لە ڕۆژی دامەزراندنیەوە تاوەکو ئێستا پارتی هەر یەکەم بووە و هەر یەکەمیش دەبێت.

چیرۆکی سەرەکی: ئەمڕۆ دووشەممە پارتی دیموکراتی کوردستان شێوازی بانگەشەی خۆی گۆڕی و دەستی بە ڕێکخستنی کەرنەڤاڵی گەورەی جەماوەری کرد، یەکەم کەرنەڤاڵ بە ئامادەبوونی مەسرور بارزانی لە یاریگای نێودەوڵەتیی زاخۆ بە بەشداریی هەزاران کەس بەڕێوەچوو.

 

لێدوانی فەرمی: مەسرور بارزانی دوای ئەوەی سڵاوی لە لایەنگرانی حیزبەکەی کرد، سەرەتای قسەکانی بەوە دەستپێکرد کە "پاڵپشت بە جەماوەری تێکۆشەر و خۆڕاگری زاخۆ، سەرکەوتنی پارتی لە هەڵبژاردنی داهاتوو مسۆگەرە، لە ڕۆژی دامەزراندنیەوە تاوەکو ئێستا پارتی هەر یەکەم بووە و هەر یەکەمیش دەبێت".

لەلایەکی دیکەوە: مەسرور بارزانی جەختی کردەوە کە پارتی هەوڵی داوە کوردستان سەرکەوێت و مافەکانی خەڵکی کوردستان بێنە دەست، "ناحەزانی پارتیش  هەوڵیان داوە پارتی بکەنە ئامانجی خۆیان و پارتی سەرنەکەوێت، پێشتر بە جۆرێک دژایەتی پارتییان دەکرد و پیلانیان دادەڕشت، ئێستاش بە جۆرێکی دیکە پیلان دادەڕێژن، بەڵام بە پشتیوانی خوای گەورە لە 20ـی ئۆکتۆبەر ئەو پیلانانە لەناودەبەین و پارتی هەر یەکەم دەبێت".