پێنج هەزار پارچە زەوی بەسەر فەرمانبەرانی هەولێر دابەش كران

ئاڤا نیوز 

 

 ئەمڕۆ قۆناغی یەكەمی پرۆسەی دابەشكردنی زەوی لە شاری هەولێر دەستیپێكرد و لە ڕێوڕەسمێكدا تیروپشک بۆ ناوی پێنج هەزار فەرمانبەری سنووری سەرۆكایەتیی شارەوانیی هەولێر كرا.

 

لێدوانی فەرمی: ساسان عەونی، وەزیری شارەوانی و گەشتوگوزار ڕایگەیاند: نەخشەی شوێنی ئەو زەوییانەی كە بە فەرمانبەران دەدرێن، بەپێی ستانداردی جیهانی ئامادە كراوە و ئەمڕۆ قۆناغی یەكەمی پرۆسەی دابەشكردنی زەوی لە شاری هەولێر دەستیپێكرد.

 

لەلایەكی دیكەوە: وەزیری شارەوانی سەبارەت بەو زەوییەی ئەمڕۆ دابەش كراوە ئاماژەی بەوە دا كە زەوییەكی تەختە و نزیكە لە سەرچاوەی ئاو و لەڕووی تۆبۆگرافییەوە گونجاوە و دەكەوێتە بەشی باكووری شاری هەولێر و شوێنی نیشتەجێبوونە.

 

زانیاریی زیاتر: ڕووبەری هەر پارچە زەوییەک 200 مەتر دووجایە و پانیی سەرجەم شەقامەكانی گەڕەكەكە 12 مەترە، ئەمە جگە لە ژمارەیەک شەقامی 30 مەتری.

 

ئەمەش بزانە: ڕووبەری تێكڕای ئەو زەوییانەی ئەمڕۆ دابەشكران 290 دۆنمە و بەپێی نەخشە %20ـی گەڕەكەكان سەوزایین و جگە لەوە هەموو خزمەتگوزارییەكانی وەک باخچەی ساوایان و قوتابخانە و بنكەی تەندروستی و فرۆشگا و نانەواخانەی تێدایە.