ناکۆکی نێوان شاسوار عەبدولواحید و عەلی حەمەساڵح گەرم دەبێت

ئاڤا نیوز

ئەنجامی بەرایی هەڵبژاردن ناکۆکی نێوان جوڵانەوەی نەوەی نوێ و ڕەوتی هەڵوێست قووڵتر دەکاتەوە، گەیشتووەتە ئاستێک لە ڕاگەیاندنەکان وشەی نەشیاو بەرامبەر یەکتر بەکاردەهێنن.

وێنە گەورەکە: شاسوار عەبدولواحید و عەلی حەمەساڵح کە هەردووکیان خۆیان بە ئۆپۆزیسیۆن دەزانن، چەندین ساڵە لە میدیاکان بەردەوام هێرش دەکەنە سەر یەکتر، دوای ڕاگەیاندنی ئەنجامە بەراییەکانی هەڵبژاردن شەڕەقسەی نێوانیان بووەتە بابەتی گەرمی سۆشیاڵ میدیا و هەریەکەیان ئەوی دیکە بە بابەتێک تۆمەتبار دەکەن.

 

چیرۆکی سەرەکی: نەوەی نوێ لە هەڵبژاردنی خولی شەشەمی پەرلەمانی کوردستان 15 کورسی و ڕەوتی هەڵوێست چوار کورسییان بەدەستهێناوە. عەلی حەمەساڵح ناڕازییە و لە کۆنگرەیەکی ڕۆژنامەوانیدا ئەنجامی هەڵبژاردنی ڕەتکردەوە و ڕایگەیاند؛ "ساختەکاری بۆ پارتی و یەکێتی کراوە و لەو ساختەکارییەش پشکی نەوەی نوێ دراوە و دەنگی ئەوانیش زیادکراوە". 

لەلایەکی دیکەوە: سەرۆکی ڕەوتی هەڵوێست ئاماژەی بۆ ئەوەش کرد دەنگی ئەوان سووتاوە، تەنانەت گوتی: "بەشێکی زۆری دەنگە پووچەڵەکان هی ئێمەن". لەم هەڵبژاردنە دوو ملیۆن و 87 هەزار دەنگدەر بەشدارییان کرد و 208 هەزاریان پووچەڵ بوون.

 

بۆچوونی بەرامبەر:  شاسوار عەبدولواحید، سەرۆکی جوڵانەوەی نەوەی نوێ، لە کۆنگرەیەکی ڕۆژنامەوانیدا گوتی: "ئەوەی پێیوایە تەزویری زۆری لێ کراوە با بایکۆتی پرۆسەی هەڵبژاردنەکان بکات و خەڵک بێهیوا نەکات." گوتیشی: "ئێمە لە بری هاتنە سەر شاشە و گریان، پارێزگاری لە دەنگی دەنگدەرانمان دەکەین نەک وەک حیزبە بەناو ئۆپۆزسیۆنەکان بێین دژایەتی حیزبێکی دیکە بکەین."

بۆچوونی بەرامبەر: عەلی حەمەساڵح بە پەیامێکی ڤیدیۆیی وەڵامی سەرۆکی جوڵانەوەی نەوەی نوێی داویەوە و گوتی: "بازرگانێكی سووخۆری ساختەچی، دەنگ دزی پارە دزی دەنگ دز دەیەوێت شەرعییەت بەخۆی بدات و كەسایەتی ئێمە بشكێنێت، خەڵکی سلێمانی ئەسڵ و فەسڵی تۆ ئەزانن و هی ئێمەش دەزانن".