جەنگی ئیسرائیل و حیزبوڵڵا زیانی 20 ملیار دۆلاری بە لوبنان گەیاندووە

ئاڤا نیوز

 

وەزیری ئابووری لوبنان ڕایدەگەیێنێت، قەبارەی زیانە ئابوورییەکان لە ئەنجامی شەڕی ئیسرائیل و حیزبوڵڵا نزیک بووەتەوە لە 20 ملیار دۆلار.

 

وێنە گەورەکە: ماوەی مانگێکە ئیسرائیل هێرشی زەمینیی بۆ سەر بەشێکی خاکی لوبنان بە ئامانجی لێدان لە بنکە و بارەگا و شوێنە ستراتیژییەکانی حیزبوڵڵا دەستپێکردووە، ئەمەش دۆخێکی دروست کردووە کە جگە لە زیانی گیانی و ئاوارەبوونی دەیان هەزار هاووڵاتیی لوبنانی بۆ ناوخۆ و دەرەوە، هاوکات زیانی دەیان ملیار دۆلاری بە لوبنان گەیاندووە.

 

ڕاگەیێنراوی فەرمی: ئەمین سەلام، وەزیری ئابووری و بازرگانیی لوبنان ڕایگەیاند، قەبارەی ئەو زیانە ئابوورییە گەورەیەی کە بەهۆی شەڕی ئیسرائیل و حیزبوڵڵا بەر لوبنان کەوتووە، بەپێی هەڵسەنگاندنی هەندێک لە دامەزراوە تایبەتەکان دەگاتە 20 ملیار دۆلار.

 

زانیاریی زیاتر: سەبارەت بەو شوێنانەی زیاتر زیانیان بەرکەوتووە، ئەمین سەلام دەڵێت، زیانی ڕاستەوخۆ بەر کەرتە سەرەکییەکانی لوبنان کەوتووە، لەوانە گەشتوگوزار، کشتوکاڵ و کەرتی خزمەتگوزاری گشتیی.

 

ئەمەش بزانە: بەهۆی دۆخی وڵاتەکەوە ڕێژەی بێکاری لە لوبنان بە نزیکەی 70٪ مەزەندە دەکرێت.