پتری دوو ملیۆن گولێن نێرگزا ل ئاکرێ هەنە و ئەڤسالە بەرهەم گەلەک زێدەبوویە

ئاڤا دیجیتاڵ

بەرهەمێ نێرگزان ل ئاکرێ گەلەک زێدەبوویە و ژبەر جوانی و بێهن خۆشیا وێ خاستا خەلکی ژی دگەل دا زێدەبوویە، نێرگز بوویە ژێدەرێ داهاتی بۆ هژمارەک جوتیارێن وی باژێری.

 

عەشقا 40 سالی دگەل نێرگزان 

جوتیارەک ل ئاکرێ بناڤێ محەمەد سالح، دەما 40 سالانە کارێ چاندن و فروتنا نێرگزا دکەت، گەلەک جاران ب گوتنا سترانان بەرەڤ ناڤ رەزێ خۆیێ نێرگزان دچیت، ئەو و نێرگز وەک دوو عاشقێن د بهارا ژیێ خودا لێ هاتینە. 

 

"40 سالە کارێ چاندنا نێرگزان دکەم"
 
"ئەڤە 40 سال پترە ئەز کارێ چاندنا نێرگزا دکەم ئەڤە رەزێ من بخۆیە و من چاڤدێری و سەخبێریا رەزێن خەلکی ژی کریە، سالا بوری هەتا 300 دەستکێن نێرگزا من فرۆتینە، بەلێ سال دگەل سالێ جودایە و ئەگەر باران زی بهێن نێرگز زوی د پشکوژن، رەزێ من یێ دێمە لێ من ئاڤی کریە و ئاڤ دایە". ئەڤە گوتنا محەمەد سالحێ جوتیارە دەربارەی رەزێ وی یێ نێرگزان. 

 

پێشبینیا فرۆتنا 200 هزار دەستکێن نێرگزان ل ئاکرێ دهێتە کرن 

د نوکەدا ل ئاکرێ بازارێ کڕین و فرۆتنا نێرگزا ژ هەمی بازارێن دیتر گەرمترە، ل دویڤ ئامارێن رێڤەبەریا چاندنێ ئەڤ سالە رێژە پترە و پێشبینی دهێتە کرن زێدەتر ژ 200 هزار دەستکێن نێرگزان بهێنە فرۆتن و ئێک دەستکێ وێ ب دوو تاکو سێ هزار دینارایە. 

 

"خەلک ل دەرڤەی ئاکرێ داخازا نێرگزان ژ مە دکەن" 

ئەسما ئاریان کڕیارا نێرگزایە و ئەو دبێژیت: "نێرگزێن ئاکرێ بێهنا وان گەلەکا خۆشە و دەما مرۆڤ دەستکەکێ دانیتە د ناڤ لێلانگەهێ یان ژوورەکا دی دا ئەو جهە تژی دبن ژ بێهنا نێرگزان، نوکە ل دەما ئەم سەرەدانا دهۆک یان زاخۆ بکەین دبێژنە مە کا هەوە بۆچی نێرگز بۆ مە دگەل خۆ نەئیناینە، ئەز خۆشحالم کو دبینم زاڤا د رۆژا شەهیانا خودا دەستکەکێ گولا نێرگزێ وەک دیاری ددەتە بیکا". 

 

"نێرگز بوویە سومبولەکا جوانیا ئاکرێ" 

ل جهێن جودا نێرگز دهێنە دیتن و بوویە سومبولا جوانیێ یا باژێرێ ئاکرێ، سازیێن گەشتیاری ژی خەلکی هانددەن کو نێرگزێن زێدەتر بچینن ژبەرکو بالا گەشتیاران بخۆ رادکێشن.

 
"نێرگزا ئاکرێ بێهن و رەنگەکێ جودا هەیە"

"ئاکرێ باژێرەکێ ناڤدارە ب بەرهەمێن خومالی و نێرگز ئێک ژ وان بەرهەمایە کو سەرنجا گەشتیاران بخۆ رادکێشیت، گولا نێرگزا ئاکرێ بێهن و رەنگەکێ جوان و جودا هەیە ئەڤ چەندە وەسا دکەت دەما گەشتیار دهێنە ئاکرێ بێی دەستکێن گولا نێرگزا نەزڤرن". ڤەهێل فەهمی، پەیڤدارێ رێڤەبەریا گەشتوگوزارا ئاکرێ ڤێ چەندێ دبێژیت. 

 

پتری دوو ملیۆن گولێن نێرگزا ل ئاکرێ هەنە 

ئەڤ سالە لسەر رووبەرێ 60 دونەمێن ئەردی نێرگز هاتینە چاندن و لگور ئامارێن نەفەرمی پتر ژ دوو ملیۆن گولێن نێرگزا ل ئاکرێ هەنە.

 

جوانترین دیاریا باژێرێ ئاکرێ دەستکەکێ گولا نێرگزایە 

دوو جورێن گولا نێرگزا هەنە ژ وان نێرگزا جۆری و نێرگزا کتک، نێرگزا جۆریی کو ب جۆرێ ئەسلی دهێتە دانان، د نوکە دا جوانترین دیاریا باژێرێ ئاکرێ دەستکەکێ گولا نێرگزایە و خواستەکا زور لسەر هەیە.