میوەی پاپایا لە عێراق بەرهەم دەهێنرێت

ئاڤا نیوز 

ماوەیەکە لە پارێزگاکانی ناوەڕاست و باشووری عێراق درەختی میوەی پاپایا دەچێنرێت، کە تەنیا لە ناوچە کەمەرەییەکان و شێدارەکان گەشە دەکات.

 

وێنە گەورەكە: عێراق بە یەكێك لە ناوچە گەرمەکانی جیهان هەژمار دەکرێت، خاكەكەی و کەشوهەواکەی هاوكار نییە بۆ پێگەیشتنی ئەوجۆرە میوانەی كە پێویستییان بە ئاو و هەوای شێدار هەیە، سەرەڕای ئەوەش ژمارەیەك جووتیار هەوڵدەدەن میوە و درەختی جیاواز لە ناوچەکە زیاد بکەن. 

 

ڕاگەیێنراوی فەرمی: ماڵپەڕی فەرمی پارێزگای ئەنبار بڵاویكردووەتەوە، ژمارەیەك جووتیاری عێراقی دەستیانكردووە بە چاندنی درەختی پاپایا كە تەنیا لە ناوچە كەمەرەییە شێدارەكان دەڕوێت و سەركەوتوو بوون لە پرۆسەكە و بەرهەمی ئەو درەختە پێگەیشتووە.

 

زانیاریی زیاتر: میوەی پاپایا ڕەنگی توێكڵەكەی لەنێوان سەوز، پڕتەقاڵی و زەردە و بەشی ناوەوەشی بەزۆری زەردباوە و تامەكەی شیرینە و تا ڕادەیەک هاوشێوەی تامی مانگۆیە. 

 

ئەوەی پێویستە بیزانیت: وڵاتی مەكسیك بە زێدی بنەڕەتی درەختەكە دادەنرێت، بەڵام هیندستان لە بەرهەمی ئەو میوەیە لە ڕێزبەندی یەکەمە، ساڵانە 5 ملیۆن و 699 هەزار تۆن میوەی پاپایا لەو وڵاتە بەرهەم دەهێنرێت.