نەوتی هەرێم لیژنەی دارایی و وەزارەتی نەوتی عێراق کۆدەکاتەوە

ئاڤا نیوز

 

لەچوارچێوەی هەنگاوەکانی دەستپێکردنەوەی هەناردەی نەوتی هەرێمی کوردستان، لیژنەی دارایی پەرلەمانی عێراق لەگەڵ وەزیر و پلە باڵاکانی وەزارەتی نەوت کۆبووەوە.

 

وێنە گەورەکە: ئەنجوومەنی وەزیرانی عێراق، بڕیاریدا هەناردەی نەوتی هەرێمی کوردستان دەستپێبکاتەوە و تا وردبینیش لە بەرهەمهێنان و گواستنەوەی نەوتی کوردستان تەواودەبێت، بەغدا بۆ هەر بەرمیلێک بەرهەمهێنان و گواستنەوەی نەوتی هەرێمی کوردستان بڕی 16 دۆلار خەرج دەکات.

 

لێدوانی فەرمی: عەتوان عەتوانی، سەرۆکی لیژنەی دارایی لە پەرلەمانی عێراق ڕایگەیاند: کۆبوونەوەکەیان درێژەپێدەری گفتوگۆکانە بەرەو ڕێککەوتنی کۆتایی بۆ دەستپێکردنەوەی هەناردەکردنی نەوتی هەرێم لە ڕێگەی هێڵی جەیهانی تورکیاوە.

 

عەتوانی ئاماژەی بەوەش کرد، هەموارکردنەوەی یاسای بودجە هەنگاوێکی گرنگە بۆ چارەسەری ڕیشەیی نەوتی هەرێمی کوردستان لەداهاتوویەکی نزیکدا. 

 

لەلایەكی دیكەوە: حەیان عەبدولغەنی ڕایگەیاند: لە ماوەی 60 ڕۆژدا تیمێكی ڕاوێژكاریی لەلایەن وەزارەتەکانی نەوت و دارایی عێراق و وەزارەتی سامانە سروشتییەکانی هەرێمی كوردستان دادەمەزرێنرێت بۆ بڕیاردان لەسەر خەرجیی دەرهێنانی نەوت لە هەرێمی كوردستان، كۆمپانیای سۆمۆ لایەنی ڕێپێدراوی وەرگرتنی نەوتی هەرێمی كوردستان دەبێت.