ئاڤا ژمارەی ئەو پارچە زەوییانە ئاشکرا دەکات کە دابەش دەکرێن

ئاڤا نیوز

 

وەزارەتەکانی حکومەتی هەرێمی کوردستان فۆرمی ئەو فەرمانبەرانەیان داوەتە وەزارەتی شارەوانی کە ڕێنماییەکانی وەرگرتنی زەوی دەیانگرێتەوە، لە وەزارەتی ناوخۆ زۆرترین فۆرم پێشکەش کراون.

 

وێنە گەورەکە: وەزارەتی شارەوانی و گەشتوگوزار ئامادەکاری بۆ دەستپێکردنی قۆناغی دووەمی دابەشکردنی زەوی دەکات، لە ئایندەیەکی نزیکدا هەر پارێزگایەک تیروپشک بۆ دابەشکردنی 10 هەزار پارچە زەوی دەکات، هەفتەی داهاتوو بەشێکی دیکەی ئەو ناوانەی وردبینییان بۆ کراوە، بە لیست ڕەوانەی ئەنجوومەنی وەزیران دەکرێن.

 

لێدوانی فەرمی: سەربەست مەولود، بەڕێوەبەری بەشی یاسایی لە وەزارەتی شارەوانی و گەشتوگوزار بە ئاڤا میدیای گوت، "بەگوێرەی ئەو داتایانەی بەردەستن، ژمارەی ئەو زەوییانەی لە هەولێر دابەش دەکرێن لە نێوان 50 بۆ  70 هەزار پارچە زەوی دەبن، لە سلێمانی 50 بۆ 65 هەزار پارچە زەوی، دهۆکیش سەرووی 35 هەزار و پارێزگای هەڵەبجە 15 بۆ 20 هەزار پارچە زەوی".  بە کۆی گشتی زەوی بە زیاتر لە 300 هەزار کەس دەدرێت.

 

زانیاریی زیاتر: تەنیا لە وەزارەتەکانی "ناوخۆ، پێشمەرگە و پەروەردە و بەڕێوەبەرایەتییەکی گشتیی خانەنشینی  252 هەزار فۆرم بۆ وەرگرتنی زەوی ڕادەستی وەزارەتی شارەوانی کراون و وردبینییان بۆ دەکرێت.