پێنج چەکداری داعش لە بۆردوومانێكی ئاسمانیدا لە کەرکووک کوژران

ئاڤا نیوز

 

لە ئەنجامی بۆردومانێکی ئاسمانی بۆ سەر پێگەیەکی چەکدارانی داعش لە وادی زغێتون لە پارێزگای كەركووك، پێنج چەکداری داعش کوژران.

 

وێنە گەورەکە: لەگەڵ ئەوەی حەوت ساڵ بەسەر کۆتاییهاتنی ڕێکخراوی داعش لە عێراق تێدەپەڕێت، بەڵام تا ئێستا شانە نوستووەکانی ئەو ڕێکخراوە، جار جار چالاکی دژی هێزە ئەمنییەکان و هاووڵاتییان ئەنجام دەدەن.

 

ڕاگەیێنراوی فەرمی: شانەی ڕاگەیاندنی ئەمنیی عێراق بڵاوی کردەوە: دوای کۆکردنەوەی زانیاریی هەواڵگری، بەرەبەیانی ئەمڕۆ پێگەیەکی چەکدارانی داعش لە دۆڵی زغێتون لە پارێزگای کەرکووک بە فڕۆکەی ئێف-16 کرایە ئامانج ، لە ئاکامدا پێنج چەکداری داعش کوژران.

 

زانیاریی زیاتر: ڕاگەیێنراوەکە ئەوەشی خستەڕوو، ئەو پێگەیەی کراوەتە ئامانج کەوتووەتە نێو چوارچێوەی کەرتی فەرماندەیی ئۆپەراسیۆنەکانی کەرکووک، لە دوای بۆردوومانەکەش تەرمی چەکدارەکان کەوتووەتە دەست هێزە ئەمنییەکان و چەندین چەک و تەقەمەنیش دەستی بەسەردا گیراوە.

 

لەلایەکی دیکەوە: پێشبینی دەکرێت یەکێک لەسەرکردەکانی داعش ناسراو بە "ئەبو موسەنا" لەنێو کوژراوەکاندا بێت، هەرچەندە شانەی ڕاگەیاندنی ئەمنیی عێراق ئەمەی پشتڕاست نەکردووەتەوە.