دەستپاکیی عێراق: ڕێکارەکانی لێپرسینەوە لە نۆ وەزیر تەواو دەبێت

ئاڤا نیوز

 

لیژنەی دەستپاکی پەرلەمانی عێراق ئاشکرای کرد، سەرجەم ڕێکارەکانی لێپرسینەوە لە نۆ وەزیر و سەرۆک دەستە تەواو بووە و چاوەڕوانی واژۆی دەستەی سەرۆکایەتی پەرلەمانە.

 

چیرۆكی سه‌ره‌كی: سەرۆکوەزیرانی عێراق لە دوایین دیداری لەگەڵ لیژنەی دەستپاکی پەرلەمان، سەرۆکی دیوانی چاودێری دارایی، سەرۆکی دەستەی دەستپاکی، جێگری سەرۆکی دادگای تێهەڵچوونەوەی کەرخ و جێگری سەرۆکی دادگای تێهەڵچوونەوەی ڕەسافە، جەختی لەسەر گرنگی هەماهەنگییەکی پتەو لە نێوان دەسەڵاتەکانی جێبەجێکردن، یاسادانان و دادوەری کردەوە بۆ پێشخستنی دۆسیەی دژەگەندەڵی و کەمتەرخەمی.

 

لێدوانی فەرمی: هادی سەلامی، ئەندامی لیژنەی دەستپاکی پەرلەمانی عێراق ڕایگەیاند: لیژنەی دەستپاکی پرسی لێپرسینەوەی لەگەڵ هەریەکە لەوەزیری  شارەوانی، بیناسازی و نیشتەجێبوون، بازرگانی، بەرگری، دەسەڵاتی ڕاگەیاندن و پەیوەندییەکان، کارەبا، نەوت، گواستنەوە و وەبەرهێنانی نیشتمانی تەواوکردووە.

لەلایەکی دیکەوە: سەلامی ئاماژەی بەوەکرد، لیژنەکەیان سەرجەم رێکارەکانی وردبینی لە چەند دۆسیەیەکی پەیوەست بەهەر وەزارەتێک و دەستەیەک تەواو کردووە و تەنیا واژۆی سەرۆکایەتی پەرلەمان ماوە بۆ دەستنیشانکردنی وادەی لێپرسینەوەکان.