نەخۆشیی پاقلەت بیستووە؟ کوڕان زیاتر تووشی دەبن

ئاڤا نیوز

نەخۆشیی پاقلە، نەخۆشییەکی بۆماوەییە و لە کوڕان زیاترە بەراورد بە کچان، چونکە لەڕێگەی کڕۆمۆسۆمی Xـەوە دەگوازرێتەوە و ڕەگەزی نێریش تەنیا یەک کڕۆمۆسۆمی  Xـی هەیە، بۆیە زیاتر تووش دەبن، هۆکارەکەیشی نەبوونی ئەنزیمی (Glucose 6 phosphate dehydrogenase)ـە لە خوێندا.

وێنە گەورەکە: ئەم ئەنزیمە ئەرکی پاراستنی خڕۆکە سوورەکانی خوێنە لە تێکشکان و شیبوونەوە، نەبوونیشی دەبێتە هۆی تێکشکان و شیبوونەوەی خوێن لەکاتی خواردنی پاقلە یان هەندێک دەرمانی دیاریکراو، زۆرجار نەخۆشەکان بەجۆرێک تووشی کەمخوێنی دەبن پێویست دەکات خوێنیان بۆ بگوازرێتەوە.

کاریگەری و لێکەوتەکان: ئەگەر نەخۆش پاقلە بخوات یان تەنانەت بۆنەکەیشی بۆ بچێت، لە ماوەی پێنج بۆ 24 کاتژمێر تووشی سەرئێشە، دڵتێکچون، ڕشانەوە، خەواڵوویی و باوێشکدان، ئازاری گەدە و بەرزبوونەوەی پلەی گەرمیی لەش دەبێت، ئەو کەسانەی ئەم نەخۆشیەیان هەیە چاویان زەرد دەبێت، زۆر بێڕەنگن و هەندێکجار بەهۆی کەم خوێنییەکەوە زەرد هەڵدەگەڕێن و ڕەنگی میزیان زۆر تۆخ دەبێت.

لێدوانی فەرمی: دیار ئیبراهیم، پسپۆڕی نەخۆشییەکانی منداڵان دەڵێت، ئەم نەخۆشییە چاکبوونی نییە، بەڵام لەگەڵ گەورەبووندا بەهۆی زیادبوونی ڕێژەی خوێن نیشانەکانی کەمتر دەردەکەون.

ئەوەی پێویستە بیزانیت: ئەگەر باوک و دایک ئەو نەخۆشیەیان هەبوو یان کەسی نزیکیان هەیبوو، دەتوانن پشکنینی خوێن بۆ منداڵەکانیان بکەن بۆ ئەوەی پێشوەخت بزانن ئەو نەخۆشییەیان هەیە یان نا، هەرکاتێکیش هەستیان کرد منداڵەکەیان ڕەنگی زەردە یان ڕەنگی میزەکەی وەک چای لێهاتووە، دەبێت دەستبەجێ سەردانی نەخۆشخانەی منداڵان بکەن بۆ پشکنین، چونکە ئەگەر خوێنی منداڵەکە زۆر کەمی کردبێت، دەبێت بەزووترین کات خوێن وەربگرێ.ت