کەشتییەکی ناسا دەچێتە نزیکترین خاڵ لە خۆر

ئاڤا نیوز

 

ئاژانسی ناسا کەشتییەکی دەنێرێتە نزیکترین خاڵ لە خۆرەوە و ئەمە یەکەمجارە کەشتییەک بگاتە ئەو خاڵە.

 

وێنە گەورەکە: پێشتر کەشتییەکی دیکەی پشکنەری خۆر (پارکەر) لە ساڵی 2018 نێردراوە بۆ بۆشایی ئاسمان بۆئەوەی لە نزیکەوە کاریگەری و دیمەنەکانی خۆر بۆ زانایان بگوازێتەوە.

 

ئەوەی ئێستا ڕوودەدات: بڕیارە، ڕۆژی سێ شەممە، 2024/12/23، کەشتی پارکەر زیاتر لە خۆر نزیک ببێتەوە و بەخێرایی 690 هەزار کیلۆمەتر لە کاتژمێرێکدا بڕوات، ئەمەش خێراترین کەشتی ئاسمانییە کە تا ئێستا دروستکراوە و قەڵغانێکی هەیە کە بەرگەی پلەی گەرمی سووتێنەر دەگرێت تا 1371 پلەی سەدی.

ئەمەش بزانە: کەشتییەکە تا مانگی 9ی ساڵی 2025 بە دووری 6 ملیۆن کیلۆمەتر لە خۆرەوە دەمێنێتەوە، بەمجۆرە ژمارەیەکی پێوانەیی لە نزیکبوونەوەی تەنێک لە خۆرەوە دەشکێنێت.

 

زانیاریی زیاتر: زانایان دەیانەوێت بزانن بۆچی کۆرۆنای خۆر سەدان هێندە لە ڕووی خۆر گەرمترە و چ هۆکارێک پاڵنەری بای خۆرە بەرەو زەوی کە کاریگەریی هەیە لەسەر گەرمبوونی زەوی و دەتوانێت بۆ ماوەیەکی کاتی گرفت بۆ پەیوەندییە ڕادیۆییەکان و کارەبا دروست بکات.