داشکاندنی 20٪ی سزای سەرپێچی هاتووچۆ بەردەوام دەبێت

ئاڤا نیوز

 

بەڕێوەبەرایەتیی هاتووچۆی هەولێر لەبارەی درێژکردنەوەی داشکاندنی سزای سەرپێچی هاتووچۆ ڕایگەیاند، هیچ بڕیارێک بۆ ڕاگرتنی لە ئەنجوومەنی وەزیران و وەزارەتی ناوخۆوە نەهاتووە.

 

وێنە گەورەکە: ڕۆژی 24-3-2024، سەرۆکوەزیران مەسرور بارزانی، لە کۆبوونەوەی ئەنجوومەنی وەزیران، بڕیاری لێخۆشبوونی 20٪ی سزا کەڵەکەبووەکانی هاتووچۆی دەرکرد، هاوکات قەرزی کرێی کارەبا و کرێی خوێندنی پاراڵێلی زانکۆ و پەیمانگاکانیشی بەهەمان ڕێژە دەرکرد.

 

لێدوانی فەرمی: عەمید هێمن ئەمین، وتەبێژی بەڕێوەبەرایەتیی هاتووچۆی هەولێر، بە ئاڤا میدیای ڕاگەیاند: دووجار بۆ ماوەی شەش مانگ پرۆسەکە درێژکرایەوە، تاوەکو ئێستاش هیچ بڕیارێک لە ئەنجوومەنی وەزیران و وەزارەتی ناوخۆ لەبارەی ڕاگرتنی 20٪ی داشکاندنی پارە کەڵەکەبووەکان نەهاتووە.

 

زانیاریی زیاتر: بە وتەی هێمن ئەمین؛ خەڵک لە داشکاندنی 20٪ی سودمەند بووە و پێشوازییەکی زۆری لێکراوە، هەر ئەمەش وایکرد دواین جار وادەی کۆتایهاتنی پرۆسەکە دیاری نەکرێت و لە ساڵی 2025یش بەردەوام دەبێت.