ئاڤا بەدواداچوون بۆ کێشەی کارمەندانی ڕۆژانەی کارەبای گەرمیان دەکات

ئاڤا نیوز

 

لەسەر داوای کارمەندانی ڕۆژانەی بەڕێوەبەرایەتیی کارەبای گەرمیان، ئاڤا بەدواداچوونی بۆ کێشەکانیان کرد، وەزارەتی کارەباش لەوبارەیەوە زانیاری دەخاتەڕوو.

 

وێنە گەورەکە: 10 کارمەندی بەڕێوەبەرایەتیی کارەبای گەرمیان، کە بە شێوەی گرێبەستی ڕۆژانە کار دەکەن، مووچەکەیان 250 هەزار دینارە، هەمان گرێبەست بۆ کارمەندانی ڕۆژانە لە هەولێر و سلێمانی کراوە، بەڵام مووچەکانیان 450 هەزار دینارە، ئەمە گازەندەی کارمەندانی ڕۆژانەی کارەبای گەرمیانە.

 

لێدوانی فەرمی: ئەردەڵان دۆسکی، بەڕێوەبەری دیوان لە وەزارەتی کارەبای حکومەتی هەرێمی کوردستان، بە ئاڤا میدیای ڕاگەیاند: کارمەندانی ڕۆژانە لە هەولێر و ئیدارەی سەربەخۆی گەرمیان یەک فەرمانیان بۆ دەرچووە، مووچەکانیان لەسەر 2%ی داهاتی وەزارەتی کارەبایە.

 

هاوکات، سەرۆکی دیوانی وەزارەتی کارەبا ئەوەش دەڵێت: هەر کارمەندێکی (ڕۆژانە) گرێبەست لە هەولێر و گەرمیان ڕۆژانەیان 25 هەزار دینارە، هەر ڕۆژێک کار بکەن بۆیان هەژمار دەکرێت، بەڵام کرێکارەکانی گەرمیان تەنیا 10 ڕۆژ کار دەکەن، بۆیە مووچەکانیان 250 هەزار دینارە.