حکومەتی نوێی سووریا هۆشداری لە هەبوونی "دەستێکی شاراوە" دەدات

گۆڤەند

حکومەتی نوێی سووریا هۆشداری لە هەبوونی "دەستێکی شاراوە" کە هەوڵی وروژاندنی ململانێی ناوخۆیی دەدات و ئاماژە بۆ ئەوە دەکات بڵاوبوونەوەی گرتە ڤیدیۆیەک کە تێیدا مەزارگەیەکی ئایینی لە شاری حەلەب دەسووتێنرێت، کۆنە و هیچ ڕووداوێکی هاوشێوە لە دوای ڕووخانی ڕژێمەوە تۆمار نەکراوە.

 

چیرۆکی سەرەکی: لە ماوەی چەند کاتژمێری ڕابردوودا گرتەیەکی ڤیدیۆیی بە خێرایی بڵاوبووەوە کە تێیدا ژمارەیەک چەکدار هێرش دەکەنە سەر مەزارگەی "ئەبو عەبدوڵڵا حوسێن خەسیبی" لە ناوچەی میسلون لە شاری حەلەب و پێنج لە خزمەتکارانی دەکوژن و مەزارگەکەش دوای تێکدانی دەسووتێنن.

 

لێدوانی فەرمی: محەممەد عومەر، وەزیری ڕاگەیاندنی سووریا ڕایگەیاند:

- حکومەت پابەندبوونی تەواوی خۆی بە پاراستنی سەرجەم شوێنە ئایینی و مێژووییەکان دووپاتدەکاتەوە و پاراستنیان لە هەر هێرشێک، بەو پێیەی میراتێکی نیشتمانی و مرۆیین کە ڕۆڵەکانی سووریا بە سەرجەم چین و توێژەکانی بە یەکەوە دەبەستێتەوە.

- سەردەمی گرژییە تائیفییەکان کە لەلایەن ڕژێمی ئەسەدەوە پەرەی پێدەدرا کۆتایی هاتووە، پاراستنی ئاشتی و کۆمەڵایەتی لە پێشینەی کارەکانی حکومەتی نوێدایە.

 

ئەوەی پێویستە بیزانیت: شێخ ئەبو عەبدوڵڵا حوسێن خەسیبی، مەرجەعێکی باڵای عەلەوییەکانە و مەزارگەکەشی بە یەکێک لە گرنگترین مەزارگەکان لەسەر ئاستی جیهان دادەنرێت.