ئەمریکا بڕیارێک سەبارەت بە سووریا دەدات

ئاڤا نیوز

 

ئەمریکا بەر لە هەڵگرتنی سزاکانی سەر سووریا، بڕیار لە بەرژەوەندی ئەو وڵاتە دەدات و دەبێتە هۆی دەستپێکردنەوەی ناردنی هاوکارییە مرۆییەکان بۆ سووریا. 

 

زانیاری بەدەستهاتوو: بەپێی ڕاپۆرتێکی وۆڵ ستریت جۆرناڵ کە تێیدا بڵاوکراوەتەوە ئیدارەی جۆ بایدن، سەرۆکی ئەمریکا بەنیازە ئەو سنووردارکردنەی کە بەسەر یارمەتییە مرۆییەکان بۆ سووریا سەپێنراوە کەم بکاتەوە ئەمەش وەک هەنگاوێک بۆ خێرا گەیاندنی پێداویستییە سەرەتاییەکان بەبێ هەڵگرتنی ئەو سزایانەی کە پێشتر بەسەر حکومەتی سووریا سەپێنرابوون.

 

 ئەوەی پێویستە بیزانیت: ئەم هەنگاوە لەلایەن ئیدارەی ئەمریکاوە پەسەند کراوە، دەسەڵات دەدات بە وەزارەتی گەنجینەی ئەمریکا بۆ ئاسانکاری گرووپە فریاگوزارییەکان و ئەو کۆمپانیایانە کە پێداویستییە سەرەتاییەکانی وەک ئاو و کارەبا و پێداویستییە مرۆییەکانی دیکە دابین دەکەن.

 

لەلایەکی دیکەوە:  ئەحمەد شیبانی، وەزیری دەرەوەی ئیدارەی نوێی سووریا لە میانەی سەردانەکەی ڕۆژی یەکشەممە بۆ قەتەڕ،  داوای هەڵوەشاندنەوەی ئەو سزایانەی کرد کە لە سەردەمی بەشار ئەسەد، لەلایەن ئەمریکاوە بەسەر دیمەشقدا سەپێنرابوون.

 

ئەمەش بزانە: لە ساڵی 2016ـەوە گرووپی تەحریرولشام و ئەحمەد شەرع، بەرپرسی ئیدارەی نوێی سووریا لە لیستی تیرۆری ئەمریکا و بەشێک لە وڵاتانی ڕۆژئاوا دان.