سەردانی شاسوار عەبدولواحید بۆ تورکیا یەکێتی نیگەران دەکات

ئاڤا نیوز

سەردانی شاسوار عەبدولواحید، سەرۆکی جووڵانەوەی نەوەی نوێ  بۆ تورکیا گفتوگۆکردن لەبارەی پێکهێنانی کابینەی نوێی حکومەتی هەرێمی کوردستان، یەکێتیی نیشتمانیی کوردستانی نیگەران کردووە و دەترسن ڕۆڵیان لاواز بێت.

چیرۆکی سەرەکەی: ڕۆژی سێشەممە ڕێککەوتی 7ـی 1ـی 2025، شاسوار عەبدولواحید لە ئەنقەرە لەگەڵ نوح یڵماز، یاریدەدەری وەزیری دەرەوەی تورکیا کۆبووەوە. ئەم سەردانەی شاسوار عەبدولواحید بە یەکەم سەردانی فەرمی و ئاشکرای دادەنرێت بۆ تورکیا لەدوای دامەزراندنی جووڵانەوەکەی لە ساڵی 2018 دا.

ڕاگەیێنراوە فەرمییەکان: وەزارەتی دەرەوەی تورکیا وێنەی کۆبوونەوەکەی لە ئێکس بڵاوکردەوە بەبێ ئەوەی هیچ شتێک لەبارەی ناوەڕۆکەکەی باس بکات. بەڵام شاسوار عەبدولواحید نەیشاردووەتەوە لەسەر پێشهاتەکانی کوردستان قسەیان کردووە، بەدڵنیاییەوە پێکهێنانی حکومەتیش یەکێکە لە پێشهاتە گرنگەکان. ناوبراو پۆستەکەی وەزارەتی دەرەوەی تورکیای لە ئێکس ڕیتویت کردوە و لەسەری نووسیوە: تاوتوێی پێشهاتە سیاسییە سەرەکییەکانی هەرێمی کوردستان بەتایبەت و عێراقیان بەگشتی کردووە.

زانیاریی تایبەت: بەپێی زانیارییەکانی ئاڤا میدیا، تورکیا بە گرنگی لە پێکهێنانی کابینەی داهاتوو دەڕوانێت و هەوڵی داوە لەگەڵ حیزبەکان قسە بکات. پێشتریش لە 17-12-2024، لەگەڵ سەڵاحەددین بەهائەددین، ئەمینداری گشتیی یەکگرتووی ئیسلامی کۆبووەوە.

شاسوار عەبدولواحید بە تورکیای وتووە: هێشتا بڕیاریان نەداوە بەشداری لە حکومەت بکەن و لە گفتوگۆدان، خۆیان پرۆژەیان هەیە بۆ بەشداریکردن لە حکومەت، بۆیە ڕەتیان نەکردووەتەوە بەشداربن و کەوتووەتە سەر گفتوگۆکان.

 

ئەمەش بزانە: لەوکاتەی شاسوار عەبدولواحید لە تورکیا بوو، سەرۆکوەزیران مەسرور بارزانییش لەوێ بوو، بەڵام بەپێی زانیارییەکانی ئاڤا بە ڕێکەوت (سوتفە) بووە و سەردانی هەردووکیان هیچ پەیوەندییەکی بەیەکەوە نەبووە.

 

کاریگەری و لێکەوتەکان: کۆبوونەوەکەی نوح یڵماز و شاسوار عەبدولواحید بووەتە هۆی نیگەرانی یەکێتی، لەوەی ڕۆڵیان لاواز بێت. دوای ڕووداوەکانی سووریا و هاتنی ئیدارەی ترەمپ، چاوەڕوان دەکرێت تورکیا ڕۆڵی لە ڕۆژهەڵاتی ناوەڕاست زیاتر بێت و کاریگەرتر بێت، بەتایبەت دوای ئەوەی ئێران ڕۆڵی لاواز بووە و پاشەکشەی کردووە.