ئەمریکا: هێزەکانمان لە سووریا  دەمێننەوە

ئاڤا نیوز

 

لۆید ئۆستن، وەزیری بەرگریی ئەمریکا جەخت لە پێویستی مانەوەی هێزەکانیان لە سووریا دەکاتەوە، چونکە هێشتا داعش بە "هەڕەشە" لە ناوچەکەدا وەسف دەکات.

 

وێنەگەورەکە: هەرچەندە شکستپێهێنانی داعش ڕاگەیێنراوە، بەڵام جموجووڵەکانی شانە نووستووەکانی بەردەوامە. لەدوای کۆتاییهاتنی دەسەڵاتی بەشار ئەسەد لە سووریا، وڵاتانی ڕۆژئاوا و ناوچەکە دووبارە سەرهەڵدانەوەی داعش بە مەترسییەکی گەورە دەبینن، ئەمریکاش مانەوەی هێزەکانی لە سووریا بە پێویست دەزانێت بۆ ڕووبەڕووبەوەی داعش.

 

لێدوانی فەرمی: لۆید ئۆستن، وەزیری بەرگریی ئەمریکا ڕایگەیاند: ''سووریا هێشتا پێویستی بە بوونی هێزەکانی ئەمریکایە، بەتایبەتی بۆ دەستەبەرکردنی ئاسایشی ئەو کەمپانەی کە دەیان هەزار چەکدارانی پێشووی داعش و ئەندامانی خێزانەکانیانی تێدایە''.

 

زانیاریی زیاتر: بەپێی خەمڵاندنەکان نزیکەی  10 هەزار ئەندامی داعش لە سووریا و عێراق لە کەمپ و حەشارگەکان هەن و دوو هەزاریان بە مەترسی دادەنرێن.

 

باکگراوند: لە ساڵی 2015 دوای داگیرکردنی ڕووبەرێکی فراوانی سووریا لەلایەن چەکدارانی داعش، ئەمریکا نزیکەی دوو هەزار سەربازی ڕەوانەی ئەو وڵاتە کرد.