شاندی باڵای هەرێمی کوردستان لەبارەی مووچە و بودجە لەگەڵ نوێنەری وڵاتان کۆدەبێتەوە

ئاڤا نیوز

 

شاندی هەرێمی کوردستان پێش ئەوەی کەیسی کێشە هەڵواسراوەکانیان ببەنە بەغدا لەهەولێر لەگەڵ نوێنەری وڵاتان کۆدەبنەوە و دیدگای حکومەتی هەرێمی کوردستان بۆ چارەسەری کێشەکان دەخەنەڕوو.

 

وێنە گەورەکە: هەولێر هەنگاوەکانی بۆ گرەنتیکردنی مافەکانی لە بەغدا خێرا دەکات، بۆ ئەوەی پێش هەموار و پەسەندکردنی خشتەی بودجەی 2025، پشکی هەرێمی کوردستان لە یاسای بودجە بدرێت و هەناردەی نەوت دەستپێبکاتەوە.

 

زانیاریی پەیامنێر: کوردستان حەسەن، پەیامنێری دیپلۆماسیی ئاڤا دەڵێت، "پێشنیوەڕۆی ئەمڕۆ پێنجشەممە لە هۆڵی سەعد عەبدوڵڵا شاندی هەرێمی کوردستان لەگەڵ نوێنەری وڵاتان کۆدەبێتەوە، ڕوونکردنەوە لەسەر کێشە هەڵواسراوەکانی نێوان هەولێر و بەغدا دەدەن و دیدگای چارەسەری کێشەکان دەخەنەڕوو."

 

زانیاریی زیاتر: شاندی هەرێمی کوردستان لە ئاوات جەناب، وەزیری دارایی و دارا ڕەشید، وەزیری پلاندانان و د. ئومێد سەباح، سەرۆکی دیوانی ئەنجوومەنی وەزیران و عەبدولحەکیم خەسرەو، سەرۆکی فەرمانگەی هەماهەنگی و بەدواداچوون و ئامانج ڕەحیم، سکرتێری ئەنجوومەنی وەزیران پێکهاتوون.