ئەمریکا: ڕێگری تەواو لە سەرهەڵدانەوەی داعش لە عێراق و سووریا دەکەین

ئاڤا نیوز

فەرماندەی فەرماندەیی ناوەندیی ئەمریکا، پابەندبوونی وڵاتەکەی بۆ بەردەوامبوون لە سەرهەڵنەدانەوەی داعش پشتڕاستکردەوە. هاوکات پاڵپشتی خۆیشی دەربڕی بۆ هەوڵەکان بۆ گەڕانەوەی دانیشتوانی کەمپی هۆل لە سووریا بۆ وڵاتانی خۆیان.

وێنە گەورەکە: ڕۆژانی چوارشەممە و پێنجشەممە ژەنەراڵ مایکل ئێریک کوریلا لە دوو سەردانی جیادا، سەربازانی وڵاتەکەی لە عێراق و سووریا بەسەر کردەوە، لەگەڵ سەرکردە سەربازییەکان دووپاتیان لە ڕێگریکردن لە سەرهەڵدانەوەی داعش کردەوە.

ڕاگەیێنراوی فەرمی: فەرماندەیی ناوەندیی ئەمەریکا ڕایگەیاند:

- جەنەراڵ کوریلا سەردانی کەمپی هۆلی لە باکووری ڕۆژهەڵاتی سوریا کردووە کە زیاتر لە 40 هەزار چەکدار لەخۆدەگرێت و زۆربەیان سەر بە داعشن.

- زیاتر لە نۆ هەزار دەستگیرکراوی داعشی بیانی کە هاووڵاتی زیاتر لە 50 وڵاتی جیاوازن لە گرتووخانەکانی کەمپی هۆلن و  کە لە زیاتر لە 12 ناوەندی دەستبەسەرکردندا ڕاگیراون.

ئەوەی پێویستە بیزانیت: کوریلا لەگەڵ سەرکردە سەربازییەکانی ئەمریکا و هێزەکانی سووریای دەیموکرات (هەسەدە) بۆ هەڵسەنگاندنی هەڵمەتی شکستپێهێنانی داعش و هەوڵەکان بۆ ڕێگریکردن لە سەرهەڵدانەوەی ئەو گرووپە تیرۆرستییە لە ناوچەکەدا کۆبووەوە.

لەلایەکی دیکەوە: کوریلا لەگەڵ سەرکردە سەربازییەکانی وڵاتەکەی لە بەغدا و  هەولێر کۆبووەوە، شکستپێهێنانی داعش لە عێراق، گەڕاندنەوەی دەستگیرکراوانی داعشی عێراقی لە گرتووخانەکانی سووریا و نۆژەنکردنەوە و یەکخستنی سەدان هاووڵاتی عێراق لە کەمپی هۆل بابەتی سەرەکی گفتوگۆکانیان بوو.