شاندی ئەمجارەی کوردستان بۆ داڤۆس زۆر جیاوازە

ئاڤا نیوز

بەبەشداری مەسروور بارزانی، سەرۆکوەزیرانی کوردستان  و دەیان سەرۆک و سەرکردەی وڵاتانی جیهان کۆڕبەندی ئابووری داڤۆس لە سویسرا دەستیپێکرد.

وێنە گەورەکە: سەرۆکوەزیرانی کوردستان لە داڤۆس دیدار و کۆبوونەوەی لەگەڵ چەندین سەرۆک و سەرکردەی جیهان دەبێت، دەرفەتەکانی برەودان بە هاریکاریی لەگەڵ هەرێمی کوردستان تاوتوێ دەکەن، بەتایبەت لە بوارەکانی ئابووری و بازرگانی و وەبەرهێناندا.

لێدوانی فەرمی: هێمن لهۆنی، ڕاوێژکاری سەرۆکوەزیران و سەرپەرشتیاری ماڵی کوردستان لە داڤۆس بە ئاڤای وت، ساڵی ڕابردوو بە دەستپێشخەری سەرۆک وەزیران بەشداریردنی هەرێمی کوردستان گۆڕدرا. پێشتر تەنها بەشداری سیاسی بوو، بەڵام ئەمساڵ گۆڕدراوە و 11 وەبەرهێنەری نیشمانیی کوردستان بەشدارن، ئامانجی ئەو بڕیارەش ئەوەیە  وەبەرهێنەران بەشداربن لە بڕیاری سیاسی و لە کۆڕبەندێکی وا گرنگ قسەیان هەبێت.

وەبەرهێنەرە نیشتمانییەکانی کوردستان لە داڤۆسن کێن؟ بریتین لە: خالید خۆشناو خاوەنی هێمن گرووپ، شێخ باز بەرزنجی خاوەنی کارگرووپ، شێخ فاخیر تەییب خاوەنی قەیوان گرووپ، ڕۆژ ئاغا دزەیی خاوەنی ئیمپایەر وۆڵد، سامان فایەق عەلی خاوەنی ساوس کوردستان، ئەحمەد قادر مەجید خاوەنی هیوا گرووپ، شوان کەریم زراری خاوەنی دۆچ فلاوەر، شوان محەمەد سلێمان خاوەنی گەلیاوا گرووپ، مەلا شینێ بەشیر شینێ خاوەنی دارین گرووپ، سەعد فایەق کۆڵەک خاوەنی کۆڵەک گرووپ، مەریوان حاجی جەمال خاوەنی ئێم جەی گرووپ.

ئەوەی پێویستە بیزانیت: لە داڤۆس ماڵی کوردستان لەسەر ڕاسپاردەی مەسرور بارزانی کراوەتەوە، چەندین چالاکی و دیدار و کۆبوونەوەی وەبەرهێنەران و سەرمایەدارانی کوردستانی تێدا دەکرێت، شاندی باڵای وڵاتان سەردانی ماڵی کوردستان دەکەن، وەکو هێمن لهۆنی دەڵێت،  ئەمساڵ ماڵی کوردستان بە فراوانتر و ڕێکخراوتر کراوەتەوە و دەبێتە وێستەگەیەک بۆئەوەی وەبەرهێنەران هاوتا جیهانییەکانیان ببینین.