هێمن لهۆنی: ئەمساڵ وڵاتان خۆیان داوایان كردووە سەردانی ماڵی كوردستان بكەن

ئاڤا نیوز

هێمن لهۆنی، ڕاوێژكاری سەرۆكوەزیران و ڕێکخەری ماڵی کوردستان لە داڤۆس ڕایدەگەیەنێت، بە دەستپێشخەری و پاڵپشتی سەرۆكوەزیران مەسرور بارزانی ماڵی كوردستانیان لە داڤۆس دروستكرد لەپێناو ئەوەی سەرمایەدارانی كورد بەشێك بن لە پرۆسەی سیاسی و داڕشتنی بڕیاری سیاسی و ئابووری.

وێنە گەورەكە: ئەمڕۆ بە بەشداری زیاتر لە 360 سەرکردە و 60 سەرۆکی وڵاتانی جیهان، کۆڕبەندی داڤۆس لە سویسرا دەستی پێکرد. هاوکات هەر ئەمڕۆ ماڵی کوردستان لە داڤۆس کرایەوە، كە بۆ ساڵی دووەمە، كوردستان خاوەنی ماڵی خۆیەتی لە كۆڕبەندەكە.

لێدوانی فەرمی: هێمن لهۆنی، ڕێکخەری ماڵی کوردستان لە كردنەوەی ماڵی كوردستان وتارێكی پێشكەش كرد و ڕایگەیاند:

- پێشتر شاندەکانی هەرێمی کوردستان بۆ داڤۆس تەنیا سیاسیی بوون و كۆبوونەوەی سیاسی دەكرا.

- لە ساڵی پارەوە سەرۆکوەزیران باوەڕی وا بووە کە دەبێت سەرمایەداران بەشێك بن لە کۆڕبەندەکە، بۆ ئەم مەبەستە چەندین دەستپێشخەریی ڕاگەیاندووە بۆ ئەوەی سەرمایەدارانی كورد بەشێك بن لە داڕشتنی بڕیاری سیاسی و ئابووری.

- لهۆنی ئاماژەی بەوەشكرد، ماڵی كوردستان پلان و بەرنامەی گەورەی هەیە بۆ پشتیوانی وەبەرهێنان لە كوردستان و دروستكردنی پەیوەندی گەورەتر بۆ سەرمایەدارانی كورد.

- جیاوازتر لە ساڵی ڕابردوو، ئەمساڵ چەندین وڵات داوایان کردووە سەردانی ماڵی کوردستان بکەن لە داڤۆس، بەوپێیەی باوەڕیان وایە دەتوانن وەبەرهێنان بكەن لە هەرێمی كوردستان.