بەغدا سەبارەت بە لیستی مووچەی مانگی یەک داواکاری لە ‌هەرێمی کوردستان هەیە

ئاڤا نیوز 

 

دوو شاندی بەغدا لە هەرێمی کوردستانن بۆ ڕێکخستنی لیستی مووچەی فەرمانبەران و خانەنشینان، داوا دەکەن ئەو خانەنشینانەی ژمارەی کەسی بێهاوتا ‘UPN’یان نییە ناوەکانیان لە لیستی مووچە دەربهێنرێت.

 

چیرۆکی سەرەکی: چەند ڕۆژێک بەر لە ئێستا شاندێکی هەرێمی کوردستان سەردانی بەغدای کرد، بەمەبەستی چارەسەرکردنی لیستی مووچە و شایستە داراییەکانی هەرێمی کوردستان، دوای گەڕانەوەی شاندەکە، دوو شاندی بەغدا هاتنە هەرێمی کوردستان بۆ ڕێکخستنی لیستی مووچەی فەرمانبەران و خانانشینان، لیستەکە تەواو کرا بوو، بەڵام بەغدا داواکارییەکی دیکەی هەیە، ئەویش دەرهێنانی ناوی ئەو فەرمانبەر و خانەنشینانەیە کە ژمارەی کەسی بێهاوتایان نییە.

 

زانیاریی بەدەستهاتوو: بەپێی زانیارییەکانی ئاڤا، لە ڕۆژی هەینیەوە فەرمانبەرانی بەڕێوەبەرایەتیی گشتیی خانەنشینی سەرقاڵی ئەوەن ناوی ئەو فەرمانبەر و خانەنشینانە دەربهێنن کە ژمارەی کەسی بێهاوتایان نییە و جیابکرێنەوە، پێویستە تا یەکشەممە کارەکە تەواو بکرێت و ڕادەستی شاندەکانی بەغدا بکرێت. بەهۆی تەواونەکردنی کارەکانیشیان تاوەکو ئێستا ڕوون نییە کەی شاندەکانی بەغدا دەگەڕێنەوە. 

 

ئەمەش بزانە: ئەو خانەنشینانەی کۆچى دواییان کردووە و بەرلەوە بایۆمەترییان کردووە، پێویستە میراتگرەکانیان بایۆمەترى بکەن و دواتر بخرێنەوە ناو لیستەکانى مووچە.