ئەم هەفتەیە ناوی 180 هەزار کەس بۆ وەرگرتنی زەوی دەگەڕێتەوە

ئاڤا نیوز

 

ئەنجوومەنی وەزیرانی هەرێمی کوردستان، کارەکانی پەیوەست بە دەستپێکردنی قۆناغی دووەمی دابەشکردنی زەوی بەسەر فەرمانبەران و کارمەندانی هێزە ئەمنییەکان تەواوکردووە و پێشبینی دەکرێت لەم هەفتەیەدا ناوەکان بە پەسەندکراوی بگەڕێنەوە بۆ وەزارەتی شارەوانی.

 

چیرۆکی سەرەکی: وەزارەتی شارەوانی هەرێمی کوردستان، پێشتر وردبینی لە ناو و فۆڕمی زیاتر لە 180 هەزار فەرمانبەر و مووچەخۆری هەرێمی کوردستان تەواوکردبوو، ڕەوانەی ئەنجوومەنی وەزیران کرابوو بۆ پەسەندکردن، ئێستا کارەکان لە ئەنجوومەنی وەزیران تەواوکراوە و چاوەڕێ دەکرێت ئەم هەفتەیە ناوەکان بە پەسەندکراوی بگەڕێتەوە و قۆناغی دووەمی دابەشکردنی زەوی لە هەموو شارەکانی هەرێمی کوردستان دەستپێبکات.

 

لێدوانی فەرمی: سه‌ربه‌ست مه‌ولوود، سەرپەرشتیاری تیمی وردبینی و ڕێکخستنی فۆڕمی دابەشکردنی زەوی له‌ وه‌زاره‌تی شاره‌وانی بە ئاڤا میدیای ڕاگەیاند: پێشبینی دەکەین لەم هەفتەیە ناوی زیاتر لە 180 هەزار کەس بۆ پێدانی زەوی بگەڕێتەوە کە ئه‌نجوومه‌نی وه‌زیران ڕەزامەندی لەسەرداون.

 

ئەوەی پێویستە بیزانیت: دوای گەڕانەوەی ناوەکان، وەزارەتی شارەوانی ناوی ئەو کەسانە ئاراستەی سنووری شارەوانییەکان دەکات، دوای دابینکردنی پارچە زەوی لەلایەن شارەوانییەکان، دەست بە دابەشکردنیان دەکرێت بەسەر فەرمانبەر و هێزە ئەمنییەکاندا.

 
ژمارەکان وا دەڵێن: پێشتر ئاڤا میدیا ئاشکرایکرد کە دیارترین ئەو وەزارەتانەی وردبینی لە فۆرمەکانیاندا کراوە ئەمانەن: 

- وەزارەتی پەروەردە 94 هەزار فۆرم.
-وەزارەتی ناوخۆ 65 هەزار فۆرم.
- وەزارەتی خوێندنی باڵا 18 هەزار فۆرم.
- وەزارەتی پێشمەرگە 13 هەزار فۆرم.

 

باکگراوند: بە بڕیاری سەرۆکوەزیران مەسرور بارزانی، دابەشکردنی زەوی بەسەر فەرمانبەراندا دەستیپێکرد، نزیکەی 300 هەزار کەس سوودمەند دەبن و زەویان پێ دەدرێت، لە قۆناغی یەکەمدا زیاتر لە 15 هەزار کەس لە هەرێمی کوردستان زەوییان وەرگرت و بۆ قۆناغی دووەمیش ناوی 180 هەزار کەس ڕەوانەی ئەنجوومەنی وەزیران کرا بۆ پەسەندکردن.