هەمواری نوێی حکومەتی عێراق لەبارەی تێچووی دەرهێنانی نەوت ڕاگیراوە

ئاڤا نیوز

 

هەموارێکی تازە بۆ یاسای بودجە و دیاریکردنی تێچووی دەرهێنان و گواستنەوەی نەوتی کێڵگە نەوتییەکانی هەرێمی کوردستان کراوە، بەڵام گفتوگۆی پێشوەختەی لەسەر نەکراوە و لیژنەی دارایی گفتوگۆی لەسەر پەسەندکردنی نەکردووە.

 

وێنە گەورەکە: هەولێر و بەغدا لەسەر ئەوە ڕێککەوتن تێچووی بەرهەمهێنان و گواستنەوەی نەوتی کوردستان لە 6 دۆلارەوە بۆ 16 دۆلار زیاد بکرێت، لە پەرلەمان دەنگی لەسەر بدرێت، بەڵام بەهۆی ناڕەزایەتیی بەشێکی لایەنە شیعەکان دانیشتنەکە هەڵگیرا و حکومەتی عێراق هەموارێکی نوێ ناردووە.

 

لێدوانی فەرمی: دارا سێکانانی، ئەندامی لیژنەی یاسایی لە پەرلەمانی عێراق بە ئاڤای گوت، " لەم هەموارە نوێ عێراق داوا دەکات تەواوی بەرهەمە نەوتییەکانی هەرێمی کوردستان لەلایەن ئەوانەوە سەرپەرشتی بکرێت، ئەمەش گفتوگۆی لەسەر نەکراوە و لیژنەی دارایی پەسەندی نەکردووە."

 

باکگراوند: لە 19ـی ئەم مانگە ئەنجوومەنی نوێنەرانی عێراق بە سەرۆکایەتی مەحموود مەشهەدانی و بە ئامادەبوونی 167 ئەندام پەرلەمان کۆبووەوە و بڕیاربوو لەبڕگەی دووەم دەنگ لەسەر هەمواری یاسای بودجە بە دیاریکراوی تێچووی گواستنەوە و دەرهێنانی نەوت بدرێت، بەڵان بەشێکی زۆری پەرلەمانتاران بە تایبەت پەرلەمانتارە شیعەکان هۆڵی کۆبوونەوەکەیان جێهێشت و دەنگی لەسەر نەدرا.