لەسەر ماددە هۆشبەرەکان بازرگانێکی کورد لە دیالە دەستگیر دەکرێت

 

ئاڤا نیوز

هێزە ئەمنییەکان لە پارێزگای دیالە یەکێک لە "ترسناکترین" بازرگانەکانی ماددەی هۆشبەر دەستگیر دەکەن، تۆمەتبارەکە کوردە و دانیشتووی قەزای کەلاری پارێزگای سلێمانییە .

وێنە گەورەکە: عێراق بووەتە گۆڕەپانی ساغکردنەوەو ناوەندێک بۆ بازرگانانی ماددە هۆشبەرەکان و خاڵی ترانزێتی ئەو ماددە هۆشبەرانەی لە شوێنی دیکەوە دەهێنرێنە نێو عێراق و لەوێشەوە بەرەو ئەوروپا و وڵاتانی دیکەی جیهان دەنێردرێت.

چیرۆکی سەرەکی: کاتژمێر 12:30ـی ڕۆژی دووشەممە هێزێکی سەر بە بەڕێوەبەرایەتیی بەرەنگاربوونەوەی ماددە هۆشبەرەکان و کارتێکەرە دەروونییەکان، توانییان تۆمەتبارێکی سەرەکی ماددە هۆشبەرەکان لە دیالە دەستگیر بکەن.

ڕاگەیێنراوی فەرمی: بەگوێرەی ڕاپۆرتی هێزە ئەمنییەکان، تۆمەتبارەکە ناوی "ن. ف. م"ـە، لە دایکبووی 1983ـەو دانیشتووی قەزای کەلاری پارێزگای سلێمانییە. بارهەڵگرێکی لە جۆری مان مۆدێل 2011ـی  پێ بووە.

ئەوەی پێویستە بیزانیت: بە گوێرەی ناوەندی ستراتیژی بۆ مافەکانی مرۆڤ لە عێراق، ئاماری ژمارەی بازرگانان و هەڵگرانی ماددەی هۆشبەر بۆ ساڵی 2024  لە عێراق بەشێوەیەکی بەرچاو زیادی کردووە، لەو ساڵەدا  14 هەزار بازرگان و بەکارهێنەری ماددە هۆشبەرەکان دەستگیرکراون.