پەیامی مەسرور بارزانی و هەرێمی کوردستان لەبارەی مووچە گەیێنرایە سوودانی

ئاڤا نیوز

ڕێباز حەملان پەیامی سەرۆکوەزیران مەسرور بارزانی و حکومەتی هەرێمی کوردستان لەبارەی مووچە و شایستە داراییەکان دەگەیێنێتە سوودانی و دوو خاڵکی ستراتیژی لەخۆدەگرێت. گوزەرانی خراپی مووچەخۆران و نوێترین زانیارییەکانیشی لەبارەی جێبەجێکردنی داواکارییەکانی وەزارەتی دارایی عێراق بۆ باس کردووە.

 

چیرۆکی سەرەکی: ڕێباز حەملان، بریکاری وەزارەتی دارایی عێراق، لەسەر ڕاسپاردەی مەسرور بارزانی، سەرۆکوەزیرانی کوردستان، بۆ بەرگریکردن لە قوتی خەڵکی کوردستان و دابینکردنی شایستە داراییەکانیان سەردانی محەممەد شیاع سوودانی، سەرۆکوەزیرانی عێراق کرد و پەیامی هەرێمی کوردستانی پێگەیاند.

ڕاگەیێنراوی فەرمی: ڕێباز حەملان دەڵێت باسی دۆخی دارایی و ئاڵەنگارییەکانیان کردووە لەم ساڵدا، دواتر لەسەر بودجە و مووچەی مووچەخۆرانی هەرێمی کوردستان، پەیامی مەسرور بارزانی و بڕیارەکانی دوایین کۆبوونەوەی نائاسایی ڕۆژی 11-1-2025ی ئەنجوومەنی وەزیرانی کوردستانی لەبارەی مووچە و شایستە داراییەکان پێگەیاندووە:

٠ هەرێمی کوردستان لە چوارچێوەی دەستوور وەک هەرێم مامەڵەی لەگەڵ بکرێت.

٠ یاسای بودجە و بڕیارەکانی دادگای فیدراڵی وەک خۆیان جێبەجێ بکرێن بەتایبەت خەرجکردنی شایستە داراییەکانی هەرێمی کوردستان.

لەلایەکی دیکەوە: ڕێباز حەملان بەوردی تەواوی ئەو هەنگاوانەی بۆ سوودانی باس کردووە کە لەسەر داواکاری وەزارەتی دارایی عێراق، لیژنە تەکنییەکانی هەردوولا ڕۆژانە لە هەولێر بەردەوام کاری لەسەر دەکەن. 

 

قووڵتر: ڕێباز حەملان بە سوودانی وتووە مووچەی خەڵکی کوردستان زۆر دواکەوتووە و بارودۆخی ژیان و گوزەرانی هاووڵاتیانی هەرێمی کوردستان لە دۆخێکی ناجێگیر و خراپە و خەڵک زۆر پشوودرێژ و خۆڕاگر بوون.

هەنگاوی داهاتوو: بڕیارە ڕۆژی هەینی 31-1-2025 لە ماڵی د.فوئاد حسێن، وەزیری دەرەوە و سەرۆکی ئەنجومەنی باڵای ئابووریی عێراق لە بەغدا، جارێکی دیکە شاندی هەرێمی کوردستان و وەزارەتی دارایی عێراق کۆببنەوە، بە ئامانجی گفتوگۆکردن لەبارەی ڕێککەوتنێکی نوێ بۆ خەرجکردنی مووچە لەمساڵدا. لەمبارەیەوە ڕێباز حەملان دەڵێت هەمووان چاوەڕوانی ئەنجامی کۆبوونەوەکەن.

باکگراوند: کۆبوونەوەی نائاسایی 11ی ئەم مانگەی ئەنجوومەنی وەزیرانی کوردستان بە بەشداریی  وەزیرانی کورد لە بەغدا و سەرۆک فراکسیۆنە کوردستانییەکان کرا، تێیدا بڕیار درا ڕاسپارەکانی کۆوونەوەکە لەلایەن وەزیرانی کورد لە حکومەتی عێراق بگەیێنرێنە سوودانی، لەجیاتی ئەوانیش ئەمڕۆ ڕێباز حەملان پەیامەکەی گەیاندووە.