هاوپەیمانیی نەسڕ: دەنگ بە هەمواری یاسای بودجە دەدەین

ئاڤا نیوز

فراكسیۆنی هاوپەیمانیی نەسڕ كە حەیدەر عەبادی سەرۆكایەتیی دەكات، هەڵوێستی خۆی سەبارەت بە هەمواری یاسای بودجە ڕادەگەیێنێت.

چیرۆکی سەرەکی: ڕۆژی یەكشەممە پەرلەمانی عێراق كۆدەبێتەوە و یەكێك لە بڕگەكانی كۆبوونەوەكە خستنەدەنگدانی هەمواری یاسای بودجەی عێراقە كە تێیدا باس لە پرسی هەناردەكردنەوەی نەوتی هەرێمی كوردستان كراوە، فراكسیۆنە كوردستانییەكان یەكدەنگن و وردە وردە فراكسیۆنەكانی دیكەی پەرلەمانیش پاڵپشتیی خۆیان بۆ دەنگدان بە هەموارەكە پێشوەختە ڕادەگەیێنن.

لێدوانی فەرمی: سەلام زوبەیدی، گوتەبێژی فراكسیۆنی هاوپەیمانیی نەسڕ لە پەرلەمانی عێراق بە ئاڤا میدیای ڕاگەیاند: فراكسیۆنەكەمان لە دانیشتنی ڕۆژی یەكشەممەی داهاتوو دەنگ بە هەمواری یاسای بودجە دەدات، ئێمە پاڵپشتی لە هەر یاسا و پڕۆژەیەك دەكەین كە خزمەت بە خەڵك بكات، ئەم یاسایەش یەكێكە لەو یاسایانەی كە خزمەت بە خەڵكی هەرێمی كوردستان و گەلی عێراق دەكات، نامانەوێت بەربەرست بین لە هەر پڕۆژەیەك كە دەبێتە هۆی چارەسەركردنی كێشەكان.

ئەوەی پێویستە بیزانیت: چوارشەممەی ڕابردوو 2025-1-29، لە ماڵی محەممەد شیاع سوودانی، سەرۆكوەزیرانی عێراق، لە شاری بەغدا سەبارەت بە هەموارکردنەوەی یاسای بودجە و پرسی هەناردەكردنەوەی نەوتی هەرێمی كوردستان كۆبوونەوەیەك لەنێوان سوودانی و سەرۆك و جێگری سەرۆكی پەرلەمان و فراكسیۆنەكان بەڕێوەچوو.