ڕاگەیێنراوێک لە وەزارەتی دارایی عێراقەوە لەبارەی کۆبوونەوەی شاندی هەولێر و بەغدا

ئاڤا نیوز

وەزارەتی دارایی عێراق دووپاتی دەکاتەوە، لەگەڵ شاندی هەرێمی کوردستان بەردەوامن لە وردبینی بۆ لیستی مووچەخۆرانی هەرێمی کوردستان و ئاماژەی بەوەش کرد، کۆبوونەوەکەیان تا درەنگانی شەو بۆ ئەو مەبەستە بەردەوام دەبێت، هاوکات ڕەتی دەکاتەوە تەیف سامی بەشدار نەبووبێت لە کۆبوونەوەکان.

چیرۆکی سەرەکی: ڕۆژی پێنجشەممە 30ی ئەم مانگە، شاندێكی باڵای حكومەتی هەرێمی كوردستان بۆ یەكلاكردنەوەی پرسی مووچە ڕووی کردە بەغدا،، ڕۆژی هەینی کۆبوونەوەیەکیان لەگەڵ بەرپرسانی عێراقی کرد و ئەمڕۆش کۆبوونەوەی لەگەڵ بەرپرسانی حکومەتی عێراق کرد و بەردەوامە.

ڕاگەیێنراوی فەرمی: وەزارەتی دارایی لە ڕاگەیێنراوێکدا ڕایگەیاند: دووپاتی دەکەینەوە، کارکردن لەگەڵ لیژنە هاوبەشەکانی عێراق و هەرێمی کوردستان دەربارەی مووچە هەر لەبەیانی تاوەکو درەنگانی ئەمشەو بەردەوام دەبین، ئەوەش بە مەبەستی وردبینی و هاوتاکردنی داتای مووچەی خانەنشینانی مەدەنی و گرێبەست و پاراستنی کۆمەڵایەتی بۆ ئەوەی بتوانین بە شێوەیەکی دروست خەرجیان بکەین.

لە بەشێکی تری ڕاگەیێنراوەکە هاتووە، دوای کۆتاییهاتنی کۆبوونەوەکە گرنگە لە وەزارەتی دارایی کۆبوونەوەیەک بکرێت بۆ وردبینیکردنی ڕاستەوخۆ و پشتڕاستکردنەوەی لیست و تێچووی ساڵانە و مانگانە و ئەنجامدانی هەموارکردنی پێویست بە خێرایی.