پارتی و یەکێتی لەبارەی پێکهێنانی حکومەت ڕێککەوتن

ئاڤا نیوز

 

لیژنەی هاوبەشی دانوستاندنكاری پارتی دیموكراتی كوردستان و یەكێتیی نیشتمانیی كوردستان بۆ پێكهێنانی كابینەی 10ـیەمی حكومەتی هەرێمی كوردستان، سەبارەت بە كۆبوونەوەی ئەمڕۆی نێوان دوو حیزبەكە ڕایگەیاند، لێكگه‌يشتنى هاوبه‌ش و ڕێككه‌وتنى سه‌ره‌تايى له‌سه‌ر زۆربه‌ى ته‌وه‌ره‌كان هاتووه‌ته‌ ئاراوه‌.

 

ڕاگەیێنراوی فەرمی: لیژنەی هاوبەشی دانوستاندنكاری پارتی و یەكێتی ڕایگەیاند: ئەمڕۆ سێشەممە 4-2-2025، ليژنه‌ى هاوبه‌شى دانوستاندنكارى يه‌كێتيى نيشتمانيى كوردستان و پارتى ديموكراتى كوردستان، دوایين كۆبوونه‌وه‌ى خۆى ئه‌نجامدا، ئه‌وه‌ش دواى چه‌ندين دانیشتنی چڕوپڕ و گفتوگۆى بنياتنه‌رانه‌ به‌مه‌به‌ستى كارى هاوبه‌ش له‌ قۆناغى داهاتووى حوكمڕانيدا، به‌ شێوه‌يه‌ك كه‌ له‌ ئاستى قۆناغی هه‌ستیاری ئێستا و چاوه‌ڕوانيى هاووڵاتيانى هه‌رێمى كوردستاندا بێت.

زانیاریی زیاتر: بەپێی ناوەڕۆكی ڕاگەیێنراوەكە له‌ ميانى كۆبوونه‌وه‌كاندا، لێكگه‌يشتنى هاوبه‌ش و ڕێككه‌وتنى سه‌ره‌تايى له‌سه‌ر زۆرینه‌ى ته‌وه‌ره‌كان هاتووه‌ته‌ ئاراوه‌ و ئه‌نجامى كۆبوونه‌وه‌كان ده‌خرێته به‌رده‌ستى ليژنه‌ى باڵاى دانوستانكارى هه‌ردوولا بۆ يه‌كلاكردنه‌وه‌ى.