وەزیری سامانە سرووشتییەکان: ئەگەر هەیە تا کۆتایی مانگی 3 هەناردەکردنەوەی نەوتی کوردستان دەستپێبکاتەوە

ئاڤا نیوز

 

شاندێکی تورکیا لە سێ ڕۆژدا دوو کۆبوونەوەی لەگەڵ هەرێمی کوردستان و عێراق لەبارەی هەناردەکردنەوەی نەوتی هەرێمی کوردستان کردووە. وەزیری سامانە سرووشتییەکانیش بە وەکالەت دەڵێت، ئەگەر هەیە تا کۆتایی مانگی 3ـی ئەمساڵ هەناردەکردنەوەی نەوت دەستپێدەکاتەوە.

 

وێنە گەورەکە: ڕۆژی 17ی ئەم مانگە شاندێكی وەزارەتی نەوتی عێراق كە پێكهاتبوون لە بریكاری وەزارەتەكە و بەڕێوەبەر و جێگری بەڕێوەبەری كۆمپانیای سۆمۆ و چەند بەرپرسێكی دیكە بەمەبەستی گفتوگۆكردن لەگەڵ بەرپرسانی باڵای هەرێمی كوردستان سەبارەت بە پرسی هەناردەكردنەوەی نەوتی هەرێمی كوردستان گەیشتنە شاری هەولێر و لەگەڵ بەرپرسانی پەیوەندیدار لە حكومەتی هەرێمی كوردستان كۆبوونەوە. هاوکات دوو ڕۆژە به‌ريس ئه‌كينجى، جێگری وەزیری دەرەوەی تورکیا شاندێكی یاوەری بە سەردانێك لە هەرێمی كوردستانن و دوێنێ لەگەڵ هەریەك لە سەرۆكی هەرێمی كوردستان و سەرۆكوەزیران مەسرور بارزانی كۆبوونەوە و یەكێك لە تەوەرە سەرەكییەكان هەناردەكردنەوەی نەوتی كوردستان بوو.

 

زانیاریی زیاتر: ئەمڕۆش شاندە توركییە سەردانی بەغدای كرد و لەگەڵ حەیان عەبدولغەنی، وەزیری نەوتی عێراق کۆبوونەوە بۆ تاووتوێكردنی هەمان پرس.

 

لێدوانەکان: كەمال محەممەد، وەزیری سامانە سروشتییەكانی هەرێمی كوردستان بەوەكالەت، بە ئاڤا میدیای ڕاگەیاند، ئەگەر هەیە تا کۆتایی مانگی 3ـی داهاتوو، هەناردەکردنەوەی نەوت دەست پێبکاتەوە و تەنیا پێویستی بە ڕەزامەندیی تورکیا هەیە.

 

-ئالب ئەرسەلان بەیرەقدار، وەزیری وزە و سەرچاوە سروشتییەکانی تورکیا بە ئاژانسی "ڕۆیتەرز"ی ڕایگەیاند: عێراق هیچ پەیوەندییەکی بە تورکیا سەبارەت بە دەستپێکردنەوەی هەناردەکردنی نەوت لە ڕێگەی بۆریی عێراق - تورکیا نەکردووە.

 

- لەسەر هەمان پرس، حەییان عەبدولغەنی، وەزیری نەوتی عێراق ڕایگەیاند، لە هەفتەی داهاتوودا، نەوتی هەرێـمی کوردستان بۆ دەرەوەی لە ڕێگەی بەندەری جەیهانی تورکیاوە دەستپێدەکاتەوە، لەمەودوا بەغدا ڕۆژانە 300 هەزار بەرمیل لە هەرێمی کوردستان وەردەگرێت.

 

ئەوەی پێویستە بیزانیت: هەولێر و بەغدا لەسەر پرسەكە بەتەواوی گەیشتوونەتە ڕێككەوتن و ئێستا بابەتەكە تەنیا لەسەر ئەوە وەستاوە كە عێراق بە فەرمی توركیا لە بابەتەكە ئاگادار بكاتەوە و  هەناردەكردنەوەی نەوتی هەرێمی کوردستان دەستپێبكاتەوە.