ئەمڕۆ شاندی باڵای پارتی و یەكێتی كۆدەبنەوە

ئاڤا نیوز

 

ئەمڕۆ شاندی باڵای دانوستاندنكاری پارتی دیموكراتی كوردستان و یەكێتیی نیشتمانیی كوردستان لە شاری سلێمانی كۆدەبنەوە.

 

وێنە گەورەكە: پارتی و یەكێتی كە براوەی یەكەم و دووەمی هەڵبژاردنی خولی شەشەمی پەرلەمانی كوردستانن، بەردەوامن لە گفتوگۆ و دانوستاندنەكانیان بۆ پێكهێنانی كابینەی دەیەمی حكومەتی هەرێمی  كوردستان، بەپێی گوتەی بەرپرسانی هەردوو حیزب نزیكبوونەتەوە لە ڕێككەوتنی كۆتایی.

 

لێدوانی فەرمی: سەعدی ئەحمەد پیرە، وتەبێژی یەکێتیی نیشتمانیی کوردستان بە ئاڤا میدیای ڕاگەیاند: ئەمڕۆ شەممە 2025-02-22، هەردوو شاندی دانوستاندنکاری پارتی و یەكێتی لە سلێمانی كۆدەبنەوە و گفتوگۆ لەبارەی ئەو ڕەشنووس و ڕاپۆرتەی كە ئامادەکراوە، دەكەن.

 

لەلایەكی دیكە: چیا هەرکی، جێگری بەرپرسی مەکتەبی ڕێکخستنی پارتی لە هەولێر بە ئاڤا میدیای ڕاگەیاند: تا ئێستاش جگە لە پۆستەکان، زۆر شتی دیکە ماوە قسەی لەسەر بکرێت، هەر بۆیە دانوستاندنەکان لە نێوان هەردوو حزب بەردەوامە، مەرجیش نییە بە یەک کۆبوونەوەی ئاستی باڵایی پارتی و یەکێتی هەموو شتێک یەکلا ببێتەوە. 

 

ئەوەی پێویستە بیزانیت: ئەو ڕەشنووسەی ئامادەکراوە لەلایەن شاندە دانوستانکارەکانی پارتی و یەکێتی گفتوگۆیان لەسەر دەکرێت، هەوڵەکان بۆ ئەوەن پێش جەژنی ڕەمەزان کابینەی نوێی حکومەت پێکبهێنرێت.