قەبارەی وەبەرهێنانی ئیمارات لە ئیتاڵیا دەگاتە 40 ملیار دۆلار

ئاڤا نیوز

خانمە سەرۆکوەزیرانی ئیتاڵیا ئاشکرای دەکات، ئیمارات بەنیازە قەبارەی وەبەرهێنانی لە وڵاتەکەی زیاد بکات بۆ 40 ملیار دۆلار لە چەندین بواری جیاوازدا.

وێنە گەورەکە: محەممەد بن زاید ئال نەهیان، سەرۆکی وڵاتی ئیمارات بۆ یەکەمجار سەردانی ئیتاڵیای کرد و لەگەڵ هاوتا ئیتاڵییەکەی و سەرۆکوەزیرانی ئەو وڵاتە کۆبووەوە، هاوکات "کۆڕبەندی بازرگانی ئیتاڵیا و ئیمارات" لە ڕۆمای پایتەختی ئیتاڵیا بەڕێوەچوو.

ڕاگەیێنراوی فەرمی: جۆرجا میلۆنی، خانمە سەرۆکوەزیرانی ئیتاڵیا ڕایگەیاند: ئەمڕۆ ڕۆژێکی مێژووییە، بڕگەیەکی دیکەی پەیوەندییەکەمانە، بڕیارمان ئەوە بوو کە ئەم هاوبەشییە لەسەر پرسە ستراتیژییەکان چڕبکەینەوە، وەکو زیرەکیی دەستکرد، ناوەندەکانی داتا، توێژینەوەی بۆشایی ئاسمان و وزەی نوێبووەوە. لەپاڵ ئەوانەشدا ئیتاڵیا و ئیمارات لە بوارەکانی بەرگری و ئاسایشدا هاوکارییەکانیان زیاتر دەکەن.

زانیاریی زیاتر:  قەبارەی بازرگانی نانەوتی نێوان هەردوو وڵات لە ساڵی 2024 گەیشتووەتە 14.1 ملیار دۆلار، بە بەراورد بە ساڵی 2023 بەڕێژەی 21.2% زیادیکردووە.