مەحما خەلیل: وەجبەی دووەمی نەوتی سپی بۆ ئاوارەكان خێراتر دەكرێت

ئاڤا نیوز

ئەندامێكی پەرلەمانی عێراق داوا دەكات، دۆخی ژیانی ئاوارەكانی نێو كەمپەكان لە سەرمای سەختی زستان لەبەرچاو بگیرێت و وەجبەی دووەمی نەوتی سپییان بەسەردا دابەش بكرێت.

چیرۆكی سەرەكی: مەحما خەلیل، پەرلەمانتاری فراكسیۆنی پارتی دیموكراتی كوردستان لە پەرلەمانی عێراق سەردانی كۆمپانیای بەرهەمە نەوتییەكانی كرد و داوای كرد پرۆسەی دابەشكردنی كاروانی دووەمی نەوتی سپی بەسەر كەمپەكان خێراتر بكرێت بەلەبەرچاوگرتنی ئەو شەپۆلە ساردییەی هەرێمی كوردستانی گرتووەتەوە و پلەكانی گەرما لە زۆر شوێن گەیشتووەتە خوار سفری سەدی.

لێدوانی فەرمی: مەحما خەلیل ڕایگەیاند،

- داوای لە حسێن تاڵیب، بەڕێوەبەری گشتی كۆمپانیای بەرهەمە نەوتییەكان كردووە، پرۆسەی دابەشكردنی وەجبەی دووەمی نەوتی سپی بەسەر كەمپی ئاوارەكان خێراتر بكات.

- جەختی لە پێویستی نۆژەنكردنەوەی وێستگە حكومییەكانی سەر بە كۆمپانیاكە لە شارۆچكەی شنگال و شارەدێی شیمال كردووەتەوە كە ماوەیەكە تێكچوون و لەكار كەوتوون.

- لەسەرەتای هەفتەی داهاتوو، هەزار سەبەتەی خۆراك بەسەر ئاوارەكانی نێو كەمپەكان دابەش دەكرێت.