لە هەولێر تیروپشک بۆ ناوی 20 هەزار فەرمانبەر دەکرێت بۆ پێدانی زەوی

 

ئاڤا نیوز

لە سنووری پارێزگای هەولێر 20 هەزار پارچە زەوی لە قۆناغی کۆتایی ئامادەکردنان بۆ دابەش کردن، لەم ڕۆژانە تیروپشک بۆ ناوەکان دەکرێت، هەر لەم قۆناغەدا زەوی بە 35 بۆ 40 هەزار فەرمانبەری دیکەی سنووری هەولێر دەدرێت.

چیرۆکی سەرەکی: قۆناغی دووەمی دابەشکردنی زەوی زیاتر لە 20 وەزارەت و فەرمانگە دەگرێتەوە، هەر لەو قۆناغەدا 216 هەزار فەرمانبەر زەوی وەردەگرن، ئەم ماوەیە شارەوانی هەولێر بە چڕی کاری لەسەر ئامادەکردنی زەوی کردووە و لەم چەند ڕۆژەی داهاتوو دەست بە تیروپشک دەکرێت.

لێدوانی فەرمی: کارزان هادی، بەڕێوەبەری شارەوانی هەولێر بە ئاڤای ڕایگەیاند، نەخشەی 20 هەزار پارچە زەوی ئامادەکراوە لە سنووری ئاشۆکان، لە قۆناغی کۆتایی ئامادەکردنیداین و لەم چەند ڕۆژەی داهاتوو تیروپشک بۆ دابەشکردنیان دەکرێت.

زانیاریی زیاتر: قۆناغی دووەمی دابەشکردنی زەوی فراوانکراوە، سەرۆکایەتی ئەنجوومەنی وەزیران بۆ ئەو قۆناغە ڕەزامەندی لەسەر نزیکەی 55 بۆ 60 هەزار فۆڕمی فەرمانبەران لە سنووری هەولێر داوە.