عەدنان زورفی: 70%ـی حەشدی شەعبی کەس نازانێت کێن و لە کوێ کاردەکەن

ئاڤا نیوز

 

ئەمینداری گشتیی بزووتنەوەی وەفای نیشتمانی عێراق ئاشکرایکرد، ساڵانە بۆ هێزەکانی حەشدی شەعبی  پێنج ترلیۆن و 300 ملیۆن  دینار خەرج دەکرێت، سیاسەتی دارایی جیهانیش ڕێگە نادات ئەم مووچە زەبەلاحە  بۆ ئەو هێزانە خەرج بکرێت.

 

بۆچی گرنگە:  عەدنان زورفی، پەرلەمانتار و ئەمینداری گشتی بزووتنەوەی "وەفا"ـی عێراقی کەسایەتییەکی بەناوبانگی شیعە مەزهەبە و نزیکە لە کۆمارییەکانی ئەمریکا و لە ئاهەنگی دەستبەکاربوونی ترەمپ وەک سەرۆکی ئەمریکا ڕاستەخۆ لە کۆشکی سپی بەشداری کرد.

 

لێدوانی فەرمی: عەدنان زورفی، ئەمینداری گشتی بزووتنەوەی "وەفا"ـی عێراقی لە چاوپێکەوتنێکی تەلەفزیۆنیدا ڕایگەیاند: 

-حەشدی شەعبی قەوارەیەکی نەناسراوە، تەنیا 30% ـی کەسانی ناسراون بەڵام 70% کەس نازانێت کێن و لە کوێ کاردەکەن. 
-لە داهاتوودا ئەمریکا دەست بەسەر موڵک و ماڵی هێزە چەکدارەکانی "بەرەی مقاوەمە" ـی عێراق دەگرێت و بەسەر کەسوکاری قوربانیانی ئەمریکا دابەشی دەکات،  هاوکات سزاکانی سەر ئەو هێزانەش بە شێوەیەکی جددی جێبەجێ دەکرێن.
-دوای مانگی نیسان، سیاسەتی ترەمپ بەرامبەر عێراق ڕوون دەبێتەوە و فەرمان دەردەکات بۆ بەئامانج گرتنی هەر شوێنێک لەعێراق بەبێ ڕاوێژکردن لەگەڵ هیچ لایەنێک.
-هەر لایەن و کەسایەتییەک پێی وابێت چوارچێوەی هەماهەنگی پارێزەری ماف و خواستی شیعەیە ئەوە بەهەڵە لە دۆخەکە تێگەیشتووە، هاوکات ئێستا خەریکی گفتوگۆین بۆ دروستکردنی هاوپەیمانییەکی سیاسی فراوان.