هەرێمی کوردستان لەبەرامبەر بڕیارێکی تەیف سامی سێ داواکاری هەیە

ئاڤا نیوز

 

حکومەتی هەرێمی کوردستان لە بەرامبەر بڕیار و داواکارییەکی تەیف سامی، وەزیری دارایی عێراق، سێ داواکاری هەیە و داواکارییەکانیش لە بەرژەوەندیی فەرمانبەران و خانەنشینانی کوردستانن. 

 

وێنە گەورەکە: وەزارەتی دارایی عێراق داوایکردووە ئەو فەرمانبەرانەی لە 01-1-2014 تاوەکو 01-7-2024 خانەنشین بوون، واتا 10 ساڵی ڕابردوویان، بڕی %3ی مووچەی بنەڕەتییان بەقیست لێ بگێڕدرێتەوە، هەروەها داواکراوە ئەو فەرمانبەرانەی ئێستاش لە ئەرکدان هەمان بڕیان لێ بگێڕدرێتەوە، ئەمەش بەبیانووی ئەوەی پێشتر لە هەرێم %3ی مووچەکان بۆ خانەنشینی دەبڕا بەڵام لە عێراق %10 بووە. 

 

ئەوەی لەبارەیەوە دەگوترێت: بەگوێرەی ئەو بڕیارەی وەزارەتی دارایی عێراق بێت، هەر فەرمانبەرێک بەپێی پلەکەی لەنێوان 600 هەزار بۆ چوار ملیۆن دینار دەبێت بداتەوە وەزارەتەکە. 

 

داواکارییەکانی هەرێمی کوردستان لەبەرامبەر ئەو بڕیارە چین؟

 

یەکەم: دەستپێکردنەوەی پرۆسەی پلە بەرزکردنەوەی فەرمانبەرانە کە زیاتر لە 10 ساڵە ڕاگیراوە.

دووەم: بڕی %3ی مووچەی بنەڕەتی ئەو فەرمانبەرانە بەقیست لێیان بگێڕدرێتەوە و دابەشی سەر مانگەکان بکرێت. 

سێیەم: هاوتاکردنی خشتەی پلە بەرزکردنەوەی فەرمانبەرانی کوردستان لەگەڵ عێراق لە 2008 ـەوە بۆ 2015، بەمەیش بەشێکی زۆری مووچەخۆران کە مووچەکانیان کەمە زیاد دەبێت.