ئیسرائیل بۆ کەنەدا و سوێد: پشتیوانیی تیرۆر مەکەن

ئاڤا نیوز

ئیسرائیل ڕەخنەی تووند لە کەنەدا و سوێد دەگرێت بەهۆی دەستپێکردنەوەی ناردنی هاوکاریی دارایی بۆ ڕێکخراوی پەنابەرە فەڵەستینییەکان و دووپات دەکاتەوە کارمەندانی ڕێکخراوەکە لە غەززە دەستیان لە "چالاکیی تیرۆریستی"دا هەبووە.

چیرۆکی سەرەکی: کەنەدا و سوێد دوای چەند هەفتەیەک لە ڕاگرتنی هاوکاریی دارایی بۆ ڕێکخراوی پەنابەرە فەڵەستینییەکانی سەر بە نەتەوە یەکگرتووەکان - UNRWA ڕایانگەیاند، دەست دەکەنەوە بە کۆمەککردنی، ئەگەرچی پێشتر سەلمێنرا هەندێک لە کارمەندەکانی ڕێکخراوەکە لە هێرشەکانی 7ی تشرینی یەکەمی حەماسدا بەشدار بوون، کە شەڕی غەززەی لێکەوتەوە.

زانیاریی زیاتر: سوید بە بڕی 20 ملیۆن دۆلار هاوکاری دەنێرێت، بەڵام کەنەدا بڕەکەی دیاری نەکردووە. کۆمیسیۆنی ئەوروپاش لە سەرەتای ئەم مانگەدا ڕایگەیاند بڕی 50 ملیۆن یۆرۆ بە ڕێکخراوەکە دەبەخشێت.

لێدوانی فەرمی: وەزارەتی دەرەوەی ئیسرائیل ڕایگەیاند: "پشتیوانی لە ڕێکخراوێک مەکەن کە سەدان ئەندامی ڕێکخراوی تیرۆریستیی حەماس کارمەندیانن. ئەمە چاوپۆشییە لە چالاکییە تیرۆریستییەکانیان و هەڵەیەکی گەورەیە".