كەسوكاری تەعۆ بەستەپیازەیی سكاڵا لەسەر فیلمی بەڕازیلیە شینەكە تۆماردەكەن

 

ئاڤا نیوز

كەسوكاری تەحسین خۆرانی كە لەنێو خەڵك بە تەعۆ بەستەپیازەیی ناسراوە، سكاڵا لەسەر بەرهەمهێنەری فیلمی (بەڕازیلییە شینەكە) تۆماردەكەن و دەڵێن كارەكتەری سەرەكی فیلمەكە كە تەعۆیە وەك كەسێكی مافیا و خوێنڕێژ نیشاندراوە.

چیرۆكی سەرەكی: دوای نمایشكردنی فیلمی بەرازیلییە شینەكە لە هۆڵەكانی سینەمای شارەكانی هەولێر و سلێمانی و ئەو دەنگدانەوانەی بەدوای خۆی هێنا، كەسوكاری كارەكتەری واقیعی فیلمەكە بەتۆمەتی ناوزڕاندن سكاڵایان تۆماركردووە.

هۆكارە زانراوەكان: كەسوكاری كەسایەتییەك بەناوی (تەحسین خۆرانی) كە لەنێو خەڵك بە تەعۆ بەستەپیازەیی ناسراوە ئاماژە بەوە دەكەن: "تەعۆ كە كارەكتەری سەرەكی فیلمەكەیە، مەبەست لێی كۆچكردوو تەحسین خۆرانیە و وا نیشاندراوە كە كەسێكی مافیایە و لە نەوەدەكانی سەدەی ڕابردوو هەر خەریكی سەرانەوەرگرتن و كوشتنی خەڵك بووە."

لێدوانی فەرمی: داروین وەیس، سیناریست و بەرهەمێنەری فیلمی بەرازیلییە شینەكە میوانی بەرنامەی كولتووری ئاڤا میدیا بوو، ڕایگەیاند، ڕاستە چیرۆكەكانی نێو فیلمەكە لە ڕووداوی ڕاستەقینەی ساڵی نەوەدەكانی شاری هەولێر وەرگیراوە، بەڵام ڕووداوەكان گشتگیرن و كۆكراوەی چەند شوێنێكی هەولێرن و هی تاكەكەسێك نییە بەتایبەت."

زانیاریی زیاتر: لە نەوەدەكان دیاردەی هەبوونی گروپی تاوانكاری حاشاهەڵنەگرە، هیچ كەس و لایەنێك ناتوانێت بەزۆری چیرۆكەكە بكاتە هی خۆی و ناشزانین لە تۆماركردنی ئەو سكاڵایە چ ئامانجێكیان هەیە، ئەمە وتەی بەرهەمهێنەری فیلمەكە.