وەزارەتی ناوخۆ دوو تیم بۆ دۆزینەوەی تەرمی ئاڤێستا ڕەوانەی مێرگەسۆر دەکات

ئاڤا نیوز

 

سەرەڕای گەڕان و پشکنینەکانی تیمەکانی بەرگریی شارستانی سنووری قەزای مێرگەسۆر، تاوەکو ئێستا تەرمی ئاڤێستا لە ڕووباری شانەدەر نەدۆزراوەتەوە، وتەبێژی بەرگریی شارستانیی هەرێمی کوردستانیش دەڵێت، "دوو تیمی دیکەمان بۆ گەڕان بەدوای ئاڤێستا دا ڕەوانەی مێرگەسۆر کردووە".

 

چیرۆکی سەرەکی: چوار ڕۆژ پێش ئێستا 'ئاڤێستا یوسف'ی تەمەن 27 ساڵ، لە ڕووباری شانەدەر لە قەزای مێرگەسۆر لە دەڤەری بارزان خنکا، تاوەکو ئێستاش تەرمەکەی نەدۆزراوەتەوە.

 

لێدوانی فەرمی: موقەدەم سەرکەوت کاڕەش، وتەبێژی بەرگریی شارستانیی هەرێمی کوردستان بە ئاڤا میدیای ڕاگەیاند: لەسەر ڕاسپاردەی وەزیری ناوخۆ و بەڕێوەبەری گشتیی بەرگریی شارستانیی هەرێمی کوردستان، سەرلەبەیانیی ئەمڕۆ چوارشەممە دوو تیمی بەرگریی شارستانی لە هەولێر و ئاکرێ بۆ دۆزینەوەی تەرمی ئاڤێستا ڕەوانەی مێرگەسۆر کراون و دەستیان بە گەڕان کردووە.

 

زانیاریی زیاتر: "بڕیارە گەڕان و پشکنینەکانمان بەردەوام بێت، تا ئەو کاتەی تەرمی ئاڤێستا دەدۆزینەوە، ئەگەر پێویست بکات تیمەکانی بەرگریی شارستانی تاوەکو یەک مانگ لە گەڕان بەردەوام دەبن.