عێراق و تورکیا جەخت لەسەر گرنگی جێبەجێکردنی بانگەوازەکەی عەبدوڵڵا ئۆجالان دەکەنەوە

ئاڤا نیوز

پێنجەمین کۆبوونەوەی ئەمنیی شاندی باڵای تورکیا - عێراق، لە پەراوێزی چوارەمین کۆڕبەندی دیپلۆماسی ئەنتاڵیا بەڕێوەچوو. هەردوولا جەختیان لەسەر گرنگی جێبەجێکردنی بانگەوازەکەی عەبدوڵڵا ئۆجالان بۆ هەڵوەشاندنەوە و دانانی چەک لەلایەن پەکەکە کردەوە و  خواستی خۆشیان بۆ بەردەوامی هەماهەنگی و هاوکاری لە دژی ئەم هەڕەشە هاوبەشە دووپات کردەوە.

چیرۆکی سەرەکی: یەکشەممە 13ـی نیسان لە پەراوێزی کۆڕبەندی دیپلۆماسی ئەنتاڵیا، پێنجەمین کۆبوونەوەی ئەمنیی شاندی باڵای عێراق و تورکیا بە سەرۆکایەتیی وەزیرانی دەرەوە، فوئاد حوسێن و هاکان فیدان بەڕێوەچوو.

ڕاگەیێنراوی فەرمی: شاندی باڵای ئەمنیی عێراق تورکیا ڕاگەیێنراوێکی هاوبەشی نۆ خاڵیان بڵاوکردەوە:

٠ هەردوولا جەختیان لەسەر گرنگی یەکڕیزی سیاسی و ڕێزگرتن لە یەکپارچەیی خاک و سەروەری یەکتر کردووە.

٠ هەردوولا سووربوونی خۆیان لەسەر زیادکردنی هەماهەنگی و هاریکارییە دووقۆڵییەکان لە بوارەکانی سەربازی، ئاسایشی سنوور، دژەتیرۆر، پیشەسازی بەرگری، وزە، ئاو و پڕۆژەی ڕێگای گەشەپێدان کردەوە.

٠ هەردوولا خواستی هاوبەشی خۆیان بۆ بەهێزکردنی پەیوەندییە دووقۆڵییەکان لە چوارچێوەیەکی دامەزراوەیی بەردەوامدا دووپات کردەوە، لە ڕێگەی سەردانەکانی دوولایەنەوە. لەم چوارچێوەیەدا تیشک خرایە سەر گرنگی سەردانی داهاتووی محەممەد شیاع سوودانی بۆ تورکیا لە 8ـی ئایاری 2025 بۆ بەشداری لە چوارەمین کۆبوونەوەی ئەنجوومەنی باڵای هاوکاری ستراتیژی.

٠ لەبەر ڕۆشنایی ئەو مەترسییە هاوبەشەی پەکەکە لەسەر هەردوو وڵات دروستی دەکات، لە کۆبوونەوەکەدا جەخت لەسەر گرنگی جێبەجێکردنی بانگەوازەکەی عەبدوڵڵا ئۆجالان بۆ هەڵوەشاندنەوە و دانانی چەک لەلایەن پەکەکە کرایەوە.

٠ لەم بارەیەوە هەردوولا خواستی هاوبەشیان بۆ بەردەوامی هەماهەنگی و هاوکاری لە دژی ئەم هەڕەشە هاوبەشە دووپات کردەوە.

٠ بە لەبەرچاوگرتنی پێویستی بەپەلە بۆ دۆزینەوەی چارەسەرێک بۆ کەمپی هۆل و کەمپی ڕۆژ و کەمپەکانی تری سووریا، هەردوولا تاوتوێی پێویستی پێکهێنانی لیژنەیەکی هاوبەشیان بۆ چارەسەرکردنی ئەم کێشەیە کرد.

٠ پەیوەست بە "میکانیزمی پێنج قۆڵی" لە سووریا و وڵاتانی دراوسێی بۆ بەرەنگاربوونەوەی تیرۆر کە لە 9ـی ئاداری 2025 لە عەممان دەستی بە کارەکانی کرد، هەردوولا جەختیان لەسەر دامەزراندنی ناوەندی ئۆپەراسیۆنە هاوبەشەکان کردەوە.

٠ هەردوولا نیگەرانی قووڵی خۆیان سەبارەت بەو پێشێلکارییانە دەربڕی کە لەلایەن ئیسرائیلییەوە بەرامبەر بە دانیشتوانی کەرتی غەززە و لوبنان و هەروەها ناوچەکانی سووریا ئەنجامدراوە.

٠ هەردوولا پێشوازییان لە دەرئەنجامە ئەرێنییەکانی دیداری ئەم دواییەی شاندی ئێران و ئەمریکا لە مەسقەت لە 12ـی نیسانی 2025 کرد و جەختیان لەوە کردەوە کە درێژەدان بەم وتووێژە ڕێگا بۆ چارەسەری ئاشتیانە بۆ ململانێکان خۆش دەکات.